Embazê Zulkuf Gezeno ke hemverê tecrîdî de çalakîya fedayî pê ard, Şahabettîn Demîrî dîyar kerd ke Gezenî binê çiman de îşkenceyêk giran dîbî, labelê timî umidê ci estbî û va: “Timî ma rê vatêne ‘ma do agêrî welatê xo.’ Vindetişê Zulkufî camêrdî dayêne ma.”
Şahabettîn Demîrî embazê zindanî yê Zulkuf Gezenî ke Zindanê Tîpa Fyî yê Tekîrdagî de seba wedarnayîşê tecrîdê serê Rayberê PKKyî Abdullah Ocalanî çalakîya fedayî pê ard yo. Şahabettîn Demîr û Gezenî Zindanê Tîpa Eyî yê Gîresûnî de 2 serrî pîya mendî. Şahabettîn Demîrî qala embazê xo yê zindanî kerd û da zanayene ke Zulkufî timî moral dayêne her kesî.
Demîrî destpêkê qiseykerdişê xo de dîyar kerd ke o Zulkuf Gezenî serra 2012î de Zindanê Gîresunî de şinasnayo û ê zindan de sey ‘Ozgur’ vendayêne Zulkufî. Demîrî va ‘embazê, hemrayê, vindetiş û tarzê cuya rêxistinî yê Gezenî moral dayêne ma’ û wina dewam kerd: “Ma her yew zindananê cîya-cîyayan ra şîbî Gîresûn. Wexto ke embaz Zulkufî newe tepişîyabî îşkenceyêko giran bi ci kerdî. Heta ame vatene ke Walîyê Amedî zî kewto muhakemeyê ci. Bedenê ci ser de şopê îşkence zêde û zêde bî. La hemverê hende îşkence û caardişan de reyna zî Zulkufî bi vindetişê xo moral û camêrdî dayêne ma.”
2012î de kewtbî grevê vêşanîye
Demîrî ard vîrî ke serra 2012î de pîya kewtî grevê vêşanîye wina dewam kerd: “Her çiqas ke problemê weşî yê hemra Zulkufî bibî zî aye wext kewt grevê vêşanîye û wextêko derg çalakîya xo dewam kerd. Embazêko fedakar û têkilîya embazîya ci xeylê baş bî. Her hetê cuye de xo resnabî. Grevê vêşanîye de zî moral dayêne embazan. Wexto ke mi çalakîya ci ya fedayî eşnawit ez xeylê hîssin bîya.”
‘Wextêko kilm de ma do agêrî welat’
Demîrî tewr peynî va ‘embaz Zulkuf Gezen bêqisûr ewnîyayêne her çî’ û qedêna: “Her çîyê qawişî o bi xo kerdêne. Timî umid zerrîya ci de estbî. Her tim ma ra vatêne ‘ma do wextêko kilm de agêrî welat.’ Ma 68 rojî grevê vêşanîye de mendî. Grevê vêşanîye de timî moral dayêne. Merdim vatêne qey qet grev de nîyo. Ez xeylê çîyan Zulkufî ra musaya û tesîrêko gird mi ser de viraşt.” WAN
