Wendekara Unîversîteya Munzurî Gulîstan Doku ra hema zî xeberêke çin a. Embazanê Gulîstane kampus de çalakîye kerdî û waştî ke rektorê unîversîte yo ke mesele pey goş keno îstîfa bikero
Gulîstane Doku 5ê çeleyî ra nata vînîbîyayeya. Çalakîyê wendekaranê Unîversîteya Munzurî yê Seba Gulîstane Doku dewam kenê. Wendekaranê ke şewe kampusê unîversîte de çalakîya protestoyî kerdbi kampus de zî çalakîya xo dewam kerdî. Wendekaran waştî ke rewşa Gulîstane bêra kifşkerdene û xebatê cigêrayîşî bêrê zêdekerdene.
Gulîstane ça de ya?
Bi seyan wendekaran waştî ke slogananê ‘Gulîstan ça de ya?’, ‘Dêrsim bêveng mebe, wayîrê Gulîstane bivejîye’ reyde seba Gulîstane çalakîya roniştişî bikerê. Rektor Ubeyde Îpekî ame hetê wendekaran û ard ziwan ke xebatê cigêrayîşî dewam kenê û peygoşîyêke çin a. Rektorî waşt ke wendekarî çalakîya xo biqednê. Wendekaran da zanayene ke çalakîya înan têna seba Gulîstane Doku ney seba serûbatanê ke unîversîte de qewimîyenê yê û serebûtê Cem Tekînogluyî vist vîrî ke wendekarê cinîyî yê unîversîteye tacîz kerdbi. Rektor wexto ke wendekaran bale antî na mesele ser kampus terikna. Wendekaran vera rektorî bi sloganê ‘Rektor îstîfa bikero’ nêrazîbîyayîşê xo mojna. Dima wendekaran rayraşîyayîşêk kerdî û çalakîye bi sloganan qedîyayî.
Şikdar Zaînal Abarakov binê Ççmdarîye de yo
Hetê bînî ra ame îdîakerdene ke gumandaro verên ê serebûtê Gulîstane Doku Zaînal Abarakov rema. Îdîa ra dima keyeyê Dokuyî Walîyê Dêrsimî Tuncay Sonel û mudirîyetê asayîşî reyde pêvînayîşêk kerd. Walî pêvînayîş de da zanayene ke Zaînal Abarakov nêrema û seba ke derheqê ci de delîlê qîmî çin ê nika binê çimdarîya înan de yo. DÊRSIM
