Mehmet Akyuzo ke embazê Îrfan Kiliçî yê ke Zîndanê Tîpa Fyî yê Kandira de vera operasyonê leşkerî yê Herêma Federe ya Kurdistanî de 3ê temmuze de cuya xo peynî kerdbî, qala çalakîya Kiliçî kerd
Hepsîyo bi nameyê Îrfan Kiliçî 3ê temmuze de Zîndanê Tîpa F-2 yê Kandira yê Kocaelî de seba protestokerdişê operasyonê leşkerî yê Herêma Federe ya Kurdistanî cuya xo peynî kerdbî. Embazê Îrfan Kiliçî yê qawişî Mehmet Akyuzo ke 10ê temmuze de serbest ame veradayene Ajansê Mezopotamya (MA) rê qala çalakîya Kiliçî kerd.
Akyuzî qiseykerdişê xo de wina va: “Ez demêk embaz Kiliçî reyde odeyêk de menda. Roja ke Kiliçî çalakî pê ard, roja hepsîyê bînan reyde sohbet û sporî bî. Mi va ez do şêra sohbet. Îrfan û embazê bînî zî vatî ‘ma do zî şêrî spor.’ Îrfan nêweş bî. Va ke do nêvejîyo spor. Mi çend reyan israr kerd, la reyna va ‘Ez xo baş hîs nêkena’ û nêvejîya spor.”
Mi qet texmîn nêkerdêne ke do Îrfan çîyêko winasî bikero
Akyuzî ard ziwan ke saet dormeyê 09.10î de ode ra vejîyayî û wina dewam kerd: “Saet dormeyê 10.00î de ma vîna ke veng û xirecirê gardîyanan teber ra vejîyeno. Kerdêne qêre qêr û vatêne ‘biewnêne kamerayan.’ Aye wext ma fehm kerd ke çîyêk bîyo. Mi qet texmîn nêkerdêne ke do Îrfan çîyêko winasî bikero. Odeya minizdîyê yê Îrfanî bî. Hedîse ra 20 deqe dima gardîyan ame va ‘mudir beg vendeno to.’ Ma nizdîyê 30 sanîye rayîr şîyî. Mi berdî cayo ke Îrfan tede çalakî pê ard. Aye wext mi rê vatî ‘Îrfan bedenê xo dayo adir ver û eynî wext de milê xo û zendanê xo bi camî birnayo.’ Mi waşt ke ez cayê hedîse bivîna. Badê israran mi berdî cayê hedîse. Wexto ke ez şîya dêsê ode sîya bibî. Cayê çalakî de şopê şewatî estbî. Şopê gonî estbî. Cêr û cor pêroyê cayan de şopê gonî estbî. Bi awe mudaxaleya adir kerdbî û her ca hî bî. Badê ke mi cayê hedîse dî, mi berdî cor.”
Îrfan timî ameyox fikirîyayêne
Akyuzî dîyar kerd ke wexto ke selahîyetdaran rê persê Îrfanî kerdo ê vatî ke wedarîyayo nêweşxane û wexto ke wedarnayî nêweşxane zî nalayêne. Akyuzî da zanayene ke hedîse ra dima dozger îfadeyê ci girewto û wina va: “Badê nîmerojî ma eşnawit ke Îrfan Kiliç cuya xo vindî kerdo. Dozger hedîse ra rojêk dima ame û ma reyde pêvînayîş pêard. Dozger dîyar kerd ke Îrfan şewat vera cuya xo vindî kerdo. Tewr peynî ke mi Îrfanî vîna, qet bi mi nêda hîskerdene ke do çalakîyêko winasî pê bîyaro. Sohbetêk ma yê pozîtîf virazîya. Dozger mi rê persê ‘Problemê ci yê psîkolojîk estbî’ pers kerd. Mi zî va nê çin bî. Îrfan timî ameyox fikirîyayêne. Sîstemê kooperatîfan ser de hişê xo rincan kerdêne. Sohbetan de projeyê manda ser de ercnayîşan kerdêne. Ma zî û Rayberê Şarê Kurdî Abdullah Ocalanî zî raybazêko winasî yê çalakî raşt nêvînenî. La ma mecburê ke hurmet nîşanê çalakîya embazê xo bidî.”
Nuşteyê xo nimitibî
Akyuzî tewr peynî dîyar kerd ke keyeyê Îrfanî reyde pêvînayîş viraşto û va: “Mi keye rê qala hedîse kerd. Zaf hîssin bîyî. mi derheqê babete de nuşteyo kenuştbî dî. Qerarê xo bi xo girewtbî. Çalakî ra ver yanî 2ê temmuze de embazanê xo rênuşte veradabî. Nuşteyê xo nimitibî. Wina asîyeno ke çiqas bi qerardarî çalakîya xo pêardo.” STENBOL
