Heyetê “Delegasyonê Mîyanneteweyî ya Çareserîya Problemê Kurd û Vera Tecrîdî” ke 8 parlamenteran ra pê yeno, 20ê Sibate de seba tecrîdê giran yê serê Rayberê PKKyî Abdullah Ocalanî ke 26 serrî yo Girawa Îmraliyî de yeno tepiştiş û 35 aşmî yo tu xebere ci ra nîna girewtiş ame Stenbol. Adresê yewine ê heyetî bî Buroyê Huqûqî yê Asrinî yo ke Rayberê PKKyî Abdullah Ocalanî rê avûkatî keno û heyet dima ra şî zîyaretê Rêxistina Kongreya Demokratîke ya Şaran (HDK) a Stenbolî. Komeleya Heqanê Merdiman (ÎHD) a Stenbolî û Komeleya Huqûqnasê Seba Azadîye (OHD) û xeylê rêxistinê sivîl ê bînan ra malumat girewt.
‘Wextê azadîya Ocalanî ameyo’
Temsîlkara Partîya Çep a Almane Konstanze Kriese, Sereka EFA Maria Lorena Lopez De Lacalle, Temsîlkara Partîya Çep a Swêdî û Foruma Çep Ann Jessica Theresa Karlqvist, Senatorê Meclîsê Neteweyî yê Spanya, Eh Bildu (BASK) Josu Estarrona Elizondo, Parlamentera Parlamentoyê Katalonyaye (CUP). Montserrat Vinyets Pages, Senatora Koma Partîya Fransa ya Bêdestûr Ségoléne Amiot, Şêwirmendê Koma Partîya Fransa yê Bêdestûr Clément Evans, parlamentera Partîya Sûre ya Norwêcî Hege Bae Nyholt ke heyet de ca gênê, Beyogluyî de bi avûkatê Buroyê Huqûqî yê Asrinî reyde kombîyayîşê çapemenî pê ard û kombîyayîş de bale ancîya serê muhîmîya azadîya Abdullah Ocalanî.
‘Ma CPTyî ra cewabêk wazenê’
Endamê heyetî 21ê Sibate de şîyî zîyaretê dayîkê ke çalakîya Nobeda Edaletî de yê û mesajê do her tim pêvînayîşê xo bi çalakîye reyde dewam bikerê da. Endamê heyetî peynîya zîyaretan de Rêxistina DEM Partîye ya Stenbolî de kombîyayîşê çapemenîye pê ard û vat: “Ma CPTyî ra derheqê dosyayê ke avûkatê Ocalanî pêşkêşê înan kerdî ra cewabêk wazenê.”
Parlamento de qisey kerd: Ganî bi lezkî Abdullah Ocalan bi hawayêk fîzîkî azad bibo!
Parlamentera Katalonyaye (CUP) Montserrat Vinyets Pagesa ke heyet de ca girewte, dima ke agêraye welatê xo çimdarîyanê xo parlamentoya xo reyde pare kerd. Montserrate dîyar kerd ke Stenbol de bi avûkatê Abdullah Ocalanî û xeylê dezgehanê sivîlî reyde pêvînayîş pê ardî û vat: “Zêdeyê 3 serrî yo tu xeberêke Rayberê Şarê Kurdî Ocalanî ra nîna girewtiş. Rayberê PKKyî 26 serrî yo tena Girava Îmraliyî de binê tecrîdêk girankerde de yeno tepiştiş. Berpirsyariyê CPTyî est o. Ganî bi lezkî azadîya fîzîkî ya Abdullah Ocalan û tepişteyê sîyasî pê bêro.”
Parlamentera CUPî Montserrat Vinyets Pagese JINNEWSî rê derheqê zîyaret û pêvînayîşanê xo de qisey kerd.
‘Têkoşînê kurdan sey ê Katalonya yo’
Montserrate dîyar kerd ke rewş û raştîya şarî û tepişteyanê Tirkîyaye manena rewşa welatê aye û vat: “Coka ra ez vera rewşa ke qewimîyena de hîsin bena. Têkoşînê kurdî zî maneno yê Katalonya. Ez vana ke heqê merdiman û qanûnê mîyanneteweyî rê hurmet nîno girewtiş û yeno peygoşkerdiş. Sewbîna dewlete bi rayîrê Meclîsî qanûnan ke vera qanûnê mîyanneteweyî yê, vejena. Amacê vetişê înan qanûnan no yo ke kesê semedê xo dişmen ceza bikera.”
‘Ganî bi hawayêkê lezkî Ocalan azad bibo’
Montserrate dîyar kerd ke ganî bi lezkî azadîya fîzîkî ya Rayberê PKKyî bêro meşrukerdiş û vat: “Ganî bi hawayêkê lezkî Ocalan azad bibo. Semedo ke mifteyê çareserîye yo. Serbestverdayîşê ci ferz o, çike hem rêzgirewtişê heqê merdiman û hem zî kilîtê çareserîye yo. Na rewşêka acîl a.”
‘Têkoşînê cinîyanê kurdan dinya roşn keno’
Montserrate dîyar kerd ke têkoşînê cinîyanê kurdan de roşnê demokrasî û azadîye yo û vat: “Semedê demokrat û sosyalîstan nimune û modelêk bi ercaye yo.”
Do parlamentoyê xo de Îmraliyî bikerî rojev
Montserrate da zanayîş ke seba teda bi CPTyî bikerê rayîrê cîya est ê û vat: “Ma eşkenê derheqê na babete de persname bidê meclîs û serê rewşe de qisey bikerê. Ez parlementoyê ma de zî endama Komîsyonê Edaletî ya. Ma eşkenê bi rayîrê nê komîsyonî bi persê ke ma CPTyî rê bikerê semedê weşanayîşê raporî teda bikerê. Ma eşkenê semedê avûkatê Katalonya zî hîna xebatan bikerê.”
‘Semedê çareserî û aştîye azadîya Ocalanî ferz o!’
Montserrate dîyar kerd ke çareserî azadîya fîzîkî ya Abdullah Ocalanî de ya û vat: “Eke prosesêk winasî bibo, do bi azadîya Ocalan pê bêro. Heta ke ma çîyêk nêceribnê ma nêzanê ke do çi bibo. Semedê prosesê azadîya Ocalanî gama yewine yo. Semedê çareserî û aştîye şertê bingeyîn azadîya Ocalan o. Mîyanê nê şertan de muzakere eşkeno destpê bikero. Ganî Ocalan tena semedê xo nê, semedê şarê kurdî û ercê ke sembol û temsîl kenê zî azad bibo.”
Têkoşînê şarê Kurdî ra îlham girewta
Montserrate da zanayîş ke aye têkoşînê şarê kurdî ra tesîr bîya û vat: “Semedê mi zaf muhîm bî ke ez tîya de bîya şahidê têkoşînê şima yê azadîye yê di rojan. Çîyê ke ez tîya de musaya û têkoşînê şima do seba şarê mi bi ercaye û bibo çimeyê îlhamî.”
