Rayberê PKKyî Abdullah Ocalano ke 24 serrî yo binê tecrîdêko giran de yeno tepiştiş. 20 aşmî yo Rayberê PKKyî Abdullah Ocalan û tepişteyanê bînan Omer Hayrî Konar, Veysî Aktaş û Hamîlî Yildirimî ra xebere nîna girewtiş. Muracatê keye û avûkatan hetê wezîrîya edaletî û serdozgerîya komarî ya Bursa ra yenê redkerdiş.
Hewldayîşê peyêne yê avukatê Komeleya Huqûqnasê Seba Azadîye (OHD) oyo ke tewr peynî heme bajaran de do muracat bêrî kerdiş. Şûbeyê OHDyî yê Stenbolî ra 155 avûkatî seba taqîpkerdişê muracatê seba pêvînayîşî bi Rayberê PKKyî Abdullah Ocalan û tepişteyanê bînan yê Îmrali, muracatê Baroyê Stenbolî dayî. Endamê Merkezê pêroyî ya OHDyî avûkate Arzu Kayaoglu derheqê muracat û sewbîna 20 aşmê ke xebere nîna girewtiş ajansê ma rê ercnayîş kerde.
Agêrayîşêke pozîtîf ya zî negatîf çinî yo
Kayaogluye dîyar kerd ke baroyê cîya yê Tirkîya û Kurdistanî ra 775 avûkatî seba ke Rayberê PKKyî û tepişteyan bînan reyde pêvînayîş bikerî muracatê wezîrîya edaletî û serdozgerîya komarî ya Bursa kerdî û wina vat: “Heta nika derheqê muracatan de ne hetê wezîrî ne zî hetê serdozgerîye ra xeberêke nêameya. Waştişê ma ne ameyî qebulkerdiş ne zî ameyî redkerdiş. Ma avukatê OHDyî zî muracatê baroya Stenbolî kerdî.”
Muracatî do bajarî de pê bêrî
Kayaogluye derheqê muracatê baroyî de zî wina vat: “Hedefê muracatanê ma no yo ke ma heqê avûkatîya xo pê bîyarî, ma wezîfeyê xo pê bîyarî. Bi muwekîlê xo Birêz Abdullah Ocalan û tepişteyanê bînan reyde pêvînayîş bikerî. Muracatê baroyan do dewam bikero. Stenbol û Wanî ra dima yew hewteyî de Kurdistan û bajaranê bînan de do muracatî dewam bikerî.”
‘Ganî CTP lezûbez raporê hadre bikero’
Kayaogluye da zanayîş ke Komîteya Taqîpkerdiş û Vernîgirewtişê Şîdetî (CPT) aşmêke verê cû ameyo Tirkîya û şîyo Îmrali û na babete de nê ercnayîşan kerd: “CPT raporan aşmêke derg de hadre keno. Dima ra hadre keno û heta ke dewletanê hetgiran ra qerarê pozîtîf nêgêro eşkera nêkeno. Yanî CPT rapor temam bikero zî ewil erşaweno Tirkîya rê. Eke dewlete ca de nêvîna CPT zî rapor eşkera nêkeno. Hadrekarîya raporî erşawitişê dewlete heta yew serrî dewam keno. Coka ra ganî CPT lezûbez rapor hadre bikero. Seba ke ma reyna muracat bikerî. Muracatê ke ma kenî heme qanûnî yî. Ma bi israr nê çîyî derg kenî. Wa dewlete qanûnê xo û yê mîyanneteweyîye pê bîyara. Derheqê nê çîyî de waştişê ma yê cîya çinî yo.”
‘Beno ke heqê cuye binê tehluke de bibo’
Kayaogluye tewr peynî dîyar kerd ke Abdullah Ocalan tewr peynî 20 aşmî verê cû pê telefonî pêvênayîşêk pê ardo û sewbîna pêvînayîşê keye û avûkatan nêameyo kerdiş. Kayaogluye vat: “Nê wextî ra dima pêvînayîş nêame kerdiş. Ganî derheqê rewşa înan de wayîrê malumatan bî. Beno ke cuya înan tehluke de biba. Rayberê PKKyî û tepişteyê bînî ganî heqê pawitişî ra nêrî verdayîş. Çimkî seba çareserîya demokratîke ganî Birêz Abdullah Ocalan reyde pêvînayîş bêrî kerdiş.” STENBOL
