Tim Engels ku li bajarê Dusseldorf ê Almanyayê li gel parêzeriya xwe bi parêzvaniya xwe ya mafên mirovan tê naskirin, bêdengiya welatên Ewropayê ya li pêşberî tecrîda giran a li Îmraliyê û sedema girîngiya azadiya Rêberê Gelê Kurd Abdullah Ocalan ji ANF’ê re nirxand.
Engels bi bîr xist ku Komîteya Pêşîgirtina li Îşkenceyê ya Konseya Ewropayê (CPT) di mijara sîstema tecrîdê û îşkenceya li Îmraliyê de muxatab e, lê belê ev sazî tenê bi erka şêwirmendiyê radibe, ji ber ku berpirsyariya sereke ya hikûmetên Konseya Ewropayê ye û ev nirxandin kir: “Biryarên Konseya Ewropayê, Tirkiyeyê eleqedar dike ku Tirkiye endamekî konseyê ye. Lê belê ger Konseya Ewropayê li gel hişyariyên CPT û biryarên Dadgeha Mafên Mirovan a Ewropayê nakeve nava liv û tevgerê û bêdeng dimîne, sedema vê yekê bêguman têkiliyên leşkerî û bazirganiyê yên bi Tirkiyeyê re ye. Her wiha divê peymana li ser penaberan a Yekitiya Ewropayê jî li vê yekê bê zêdekirin. Tirsa herî mezin ew e ku Tirkiye bikeve nava hewldanên ku vê peymanê bixe nava metirsiyê.”
‘Azadiya wê tevkariyê li aştiyê bike’
Parêzvanê Mafên Mirovan ê alman Engel anî ziman ku azadiya Abdullah Ocalan dê ji bo gelên li herêmê aştî û azadiyê bîne û wiha got: “Bi dîtina min wê tevkariya herî mezin li xwerêveberî, azadiya jinan û Konfederalîzma Demokratîk a civaka demokratîk-ekolojîk bike.”
Tim Engels bi bîr xist ku ji agirbesta destpêkê ya sala 1993’an heta pêvajoya Oslo, pêvajoya çareserî û aştiyê ya li Îmraliyê gavên ji bo aştiyê hemû ji aliyê Abdullah Ocalan ve hatin avêtin û wiha domand: “Bêguman qedandina şer û destpêkirina pêvajoya çareseriyê di destê wî de ye, ev yek beriya niha gelek caran hate dîtin.”
Parêzvanê alman rola Rêberê Gelê Kurd Abdullah Ocalan şiband rola diyarker a Nelson Mandela, Gerry Adams, Yaser Arafat, Arnaldo Otegi û Carles Puigdemont ku di pêvajoyên çareserî û danûstandinan de lîst.
‘Fikr û berhemên wî bandorê li herêmê dikin’
Her wiha Engels destnîşan kir ku fikir û berhemên Ocalan ne tenê bandorê li tevgera azadiyê ya kurd dike, her wiha bandorê li gelên Rojhilata Navîn bi taybetî hindikahiyên li herêmê dike û axaftina xwe wiha bi dawî kir: “Jixwe ji ber ku ev rola wî tê zanîn Abdullah Ocalan li girtîgehê tecrîdkirî ye. Ji ber ku dewleta tirk ne alîgirê aştî û çareseriyê ye.” DUSSELDORF
