Kongreya 8’emîn a Partiya Yekitiya Demokratîk li bajarokê Rimêlan ê girêdayî kantona Qamişloyê di 24-25’ê sibatê de bi dirûşma ‘Bi yekitiya demokratîk re em dagirkeriyê tune dikin, Rêveberiya Xweser pêş dixin û Sûriyeyek demokratîk ava dikin’ pêk hat. 600 delege ji bakur û rojhilatê Sûriyeyê, başûrê Kurdistanê û Ewropayê tev li kongreyê bûn. Nûnerên Meclisa Sûriya Demokratîk, Hêzên Sûriya Demokratîk, Heyet Tensîq a Watanî-Tevgera Guhertin, Partiya Yekitiya Suryan, Desteya Rûspiyan a Bakur û Rojhilatê Sûriyeyê, kesayetên siyasî û civakî, nûnerên partiyan ên bakur û rojhilatê Sûriyeyê, nûnerên Rêveberiya Xweser a Bakur û Rojhilatê Sûriyeyê, nûnerên rêxistinên jin û ciwan, êlên kurd û ereb, rewşenbîr û akademisyen wek mêvan tev li kongreyê bûn.
Piştî hilbijartina hevserokatiya partiyê, endamên Meclisa Giştî ya partiyê hatin hilbijratin. Delegeyên kongreyê biryar dan ku hejmara endamên Meclisa Giştî ya partiyê li şûna 49 bibe 90 endam. Endamên Desteya Rêveber li şûna 13 bibin 20. Ji 90 endamên meclisê; 41 endamên herêma Cizîrê, 18 endamên herêma Firatê, 14 endamên herêma Efrînê, 6 endamên bajarê Helebê, 9 endamên Ewropa, endamek Lubnan û endamekê Îmaratê hatin hilbijartin. Piştî hilbijartina Enwer Muslim û Eyşe Hiso wek Hevserokên Partiya Yekitiya Demokratîk, hatin hilbijartin. Kongre bi hilbijartina 7 endaman wek Komîteya Displînê bidawî bû. QAMIŞLO
