Wekîlê Partîya Demokratîke ya Şaran (HDP) yê Çewlîgî Erdal Aydemîrî meclîs de seba ke Çewlîgo ke binê rîskê girdî yê erdlerzî de yo, bibo herêma afate, vernîyazê qanûnî teqdîm kerd.
Aydemîrî vat: ”Erdlerzê Mereşî yo ke 6ê sibate de qewimîya, tesîrê 14 mîlyon kesan kerd. Goreyê hûmara fermî Amed, Semsûr, Dîlok, Meletî, Adana, Mereş, Hatay, Riha, Kilis û Osmanîye de 42 hezar û 310 kesan dinayaya xo bedilnaye. Bi se hezaran kesî zî birîndar bîyî. Rixmo ke Tirkîya herêma erdlerzî ya AKPyo ke 20 serrî yo îqtîdar de yo tedbîrî nêgirewtî. Îqtîdarê AKP-MHPyî têna derdê xo de yo, şar xemê înan de nîyo. Wextê erdlerzî de zî ê peyê rantî de yê.”
Aydemîrî vat: ”Badê erdlerzî 11 bajarî sey herêma afate ameyî îlankerdene. Pîsporê erdlerzî tim semedê erdlerzê Çewlîgî hîşyar kenê. Coka ganî Çewlîg zî bibo herêma afate. Wird xetê fayî yê rojhelat û vakurî Çewlîg de resenê pê. Goreyê raporê rîskê erdlerzî yê AFADî bajarê ma Çewlîg mîyanê nê bajaran de yo ke ke tewr zaf binê rîskî de yê. Erdlerzê peyênî yê Çewlîgî yê 2003 de tewr tay 176 kesan dinayaya xo bedilnaye û 625 bînayî rijîyayî. Wird erdlerzanê peyênan û erdlerzê ke dima benê bajarê ma de yenê hîskerdene. Pîsporê babete vanê ke ê Çewlîg de erdlerz pawenê. Çîyo muhîm oyo ke hema felakete nêbîya, tedbîrî bêrê girewtene. Hema ke erdlerz nêbîyo ganî bajarê ma de tedbîrê ke hewce kenê bêrê girewtene. Coka ganî Çewlîg zî sey herêma afate bêro îlankerdene.”
