Wekîlê Partîya Demokratîke ya Şaran (HDP) yê Çewlîgî Erdal Aydemîrî dima ke Çewlîg de esnafî zîyaret kerd meseleyî bi vernîyazêkê persî berd rojdemê Meclîsî. Aydemîrî Wezîra Xizmetanê Komelkî, Xebat û Keyeyî Zehra Zumrut Selçuk û Wezîrê Ekonomîyî Berat Albayrakî ra waşt ke cewab bidê persanê ci.
Aydemîrî bale ante ser ke goreyê doneyanê Dezgehê Îstatîstîkî yê Tirkîya (TUÎK) Tirkîya de hûmara bêkeranê ke zanîngehan ra mezûn bîyê, 15 serranê peyênan de se ra 263 zêdîyaye. Aydemîr sebebê nê zêdîyayîşî wezîran ra persa.
Aydemîrî vat: ”Ma zîyaretê xo yê Çewlîgî de na rewşe bi xo dîye. Ciwanê ke zanîngehan ra mezûn bîye cayanê qijkekan ê sey qewexane, lokanta, bufe de xebitîyenê. Ciwanî warê xo de nêeşkenê karêk bivînê coka neçare manenê ke karanê cîyayan bikerê. Ciwanan ma rê îfade kerd ke rîyê bêkarîye ra şinê teberê welatî. Ganî mexdurîyetê nê ciwanan bêrê çareserkerdene û ciwanî bêrê îstîhdamkerdene.
Aydemîrî vernîyazê xo de nê persî persayî:
-Çira hûmara ciwanan ê bêkaran zêdîyena? Derheqê na mesele de xebatêka şima esta?
-Nîsbetê ê ciwananê ke bêkarîye ra şinê teberê welatî çendek o? Şima do verê naye senî bigêrê? ÇEWLÎG
