Ergîn Akhano ke çalakîya xo ya grevê vêşanîye açarna rojeyê mergî va: “Heta tecrîdê şexsê Ocalanî de yo ke şarî ser o yeno ferzkerdene nêqedîyo do xoverdayîş zî dewam bikero.”
Seke yeno zanayene çalakîya grevê vêşanîye ke seba wedarnayîşê tecrîdê serê Rayberê PKKyî Abdullah Ocalanî dabî destpêkerdiş bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke 181 rojî ya grevê vêşanîye de ya dîyabî dest pêkerdene, hetê 15 hepsîyanê sîyasî ra açarîyabî rojeyê mergî. Pêroyê çalakîyan bi qerardarî dewam kena û resaya merhaleyêka krîtîke. Hepsîyê ke Zîndanê Tîpa Dyî yê Amedî de rojeyê mergî de yî ra yew zî Ergîn Akhan o.
Akhanî da zanayene ke ê biqerar ê tecrîdî biqedînê. Akhan 20ê Adara 1988î de qezaya Kopî ya Mûşî de ame dinya. Mekteba ewilêne dewa Kekelî de, mekteba mîyanêne Kop de û lîse zî Îzmîr de wende. Tîya mucadeleyê azadîye yê Kurdistanî nas kerd û emrê xo xelata mucadeleyî û şarê xo kerd. Akhan 9ê Teşrîna Verêne ya 2015î de qezaya Baglarî ya Amedî de ame tepiştene. Ergîn Akhano ke Zîndanê Amedî yê Tîpê Dyî de yo, 1ê Adare de dest bi grevê vêşanîye kerd. Akhanî 30ê Nîsane de grevê vêşanîye açarna rojeyê mergî. Akhan bi rayîrê keyeyê xo mesaj şirawit.
Akhanî va: “Seba ke tecrîdkerdişê Rayberê Şarê Kurdî Abdullah Ocalanî biqedîyo, ma qerarê xoverdayîşî da. Tecrîdo ke şexsê Rayberê ma de şarê ma ser o yeno ferzkerdene, nêno qebûlkerdene. Naye ra ganî tecrîd biqedîyo. Bi xoverdayîşê heme embazanê ma yê ke grev de yê, ma biqerar ê ke peynîya tecrîdî bîyarê. Seba qedîyayîşê tecrîdî heta nika xeylî embazanê ma canê xo feda kerd û bi hezaran embazê ma amade yê ke xo feda bikerê. Qerardarîya ma xeylî zêde ya.”
Keyeyê Akhanî zî bale ant serê qerardarîya lajê xo û va: “Ê heqdar ê, çunke tu cayêkê bînî yê dinya de bêhuqûqîyêka winayêne çina. Ma heta peynî paştî danê domananê xo, ma înan dir ê. Heme xoverdayoxî domanê ma yê.” MÛŞ
