Dewleta tirk û çeteyên girêdayî wê gundên Dirbêsiyê, Tirbespiyê, Dêrik û navenda Eyn Îsayê topbaran û bombebaran kir. Hat zanîn ku li gundên Tirbespiyeyê di navbera şervanên HSD’ê û hêzên artêşa tirk şer rû daye
Êrîşên hêzên artêşa tirk û komên çete yên girêdayî wê yên li dijî bakur û rojavayê Sûriyeyê didomin. Di vê çarçoveyê de hêzên dagirker gelek gundên Dirbêsiyê, Tirbespiyê, Dêrik û Eyn Îsayê bombebaran û topbaran kir.
Li gorî agahiyên ji herêmê, hêzên dagirker ên dewleta tirk û çeteyên wê cara duyemîn navçeya Eyn Îsa bombebaran kir. Di heman demê de hêzên dagirker derdora navçeya Dirbêsiyê ya kantona Hesekê ya herêma Cizîrê jî topbaran dike.
Li Tirbespiyê şervanan bersiv da
Çavkaniyên ji herêmê ragihandin ku hêzên dagirker derdora navçeya Tirbespiyê û 3 gundên girêdayî wê topbaran kir. Hat zanîn ku şervanên HSD’ê jî li vê derdorê bersiva hêzên dagirker dan. Her wiha hat zanîn ku li gundên Til Cîhan, Kêl Hesnak û Dêrna Qunlinga yê Tirbespiyeyê di navbera şervanên HSD’ê û artêşa tirk a dagirker da şer rû da. Artêşa tirk a dagirker bi çekên giran qadên sivîlan topbaran dikin.
Bendava Mensurayê hat topbarankirin
Artêşa tirk a dagirker niha jî Bendava Mensurayê ya li gundewarên Dêrikê topbaran dike. Dewleta tirk ji bo koçberkirina gelên herêmê, binesaziya herêmê hedef digire.
