Reîsê eşîra Herkîyî Cewher Muhyedînî bale ant zext û zulmo ke endamanê înan ser o yeno kerdene ser û PDKyî hîşyar kerd. Muhyedînî va: “Ma do tîya ra tepîya bêveng nêmanê.”
Herkî ê eşîran ra yew a ke Başûrê Kurdistanî û çar perçeyanê Kurdistanî de vila bîya. Tewr zaf herêmanê Behdînan, Lolan û herêmanê bînan ê Başûrê Kurdistanî de ya.
Eşîra Herkîyî temamê tarîxî de ê eşîran ra yew a ke PDKyî dir tim xîlafê ci estbîyê. Rîyê xîlafan ra zî her tim aye ser o zextî bîyê. Endam û ciwananê eşîre seba ke reîsê eşîre derheqê zext û zulmê peyênî de hayîdar bikerê xeylî nameyî nuştî. Reîsê eşîre Cewher Muhyedînî zî cewab da nameyanê ciwanan. Cewabê xo de Muhyedînî bale ante ke do hemverê zext û zulmî de hendî bêveng memanê û endamanê eşîre ra zî waşt ke bibê yew û bi nê hawayî tê bigêrê.
Muhyedînî bale ante serê kede û mucadeleyê endamanê eşîra ê yê seba azadîya şarî û welatî û va: “Ez do rayîr nêdî zext û zordarîya ke nika eşîra ma ser o yena kerdene. Ma kemî nêyê, mîyanê welatî de keda ma kemî nêya. Ma do bi îrade û hêzê xo tim aver şirê. Ma do rayîr nêdê ke tîya ra tepîya tu hêz û kes ma ser o zextan bikero.”
Muhyedînî va: “Înan ra xeyal ma do teslîm bibê yan zî dest heqan û erdanê xo ra vera bide. Tîya ra tepîya ma do hemverê zext û zulmî de bêveng memanê. Ma do tîya ra tepîya sîstemî û nê zulmî qebul nêkerê. Ez do sey şexsêk bidî peyê nê. Eke tîya ra tepîya heqaret û zulm ro yew ciwanê eşîra ma bêro kerdene, ma do nê sey heqaretêkê hemverê lajê Mihê Axa Cewherî, hemverê heme Herkîyan de ameyo kerdene bivînê. Ez wazena ke pîya mîyanê yewîye de tê bigêrê.” SILÊMANÎYE
