Rûspiyên eşîrên ereb ên Herêma Cizîrê û parêzgeha Dêrazorê bi daxuyaniyekê êrîşên dewleta tirk şermezar kirin û piştgiriya xwe ya bi şervanên HSD’ê re ragihandin. Eşîrên ereb ji bo parastina xaka xwe seferberî ragihand
Ji bo şermezarkirina êrîşên dewleta tirk a dagirker ên li dijî rojavayê Kurdistanê û hedefgirtina sivîlan, rûspiyên eşîrên ereb ên Herêma Cizîrê û parêzgeha Dêrazorê, li qada Akademiya Şehîd Brosk a Taybet a HSD’ê ya Şedad a Hesekê daxuyaniyek da.
Daxuyanî ji hêla Şêx Silêman Derwîş ku hevserokê Meclisa Eşîrên Herêma Cizîrê ye ve hate xwendin. Di daxuyaniyê de hat gotin ku di dirêjahiya salên borî de, HSD’ê ku ji pêkhateyên Sûriyeyê yên kurd, ereb, misilman, xiristiyan û êzidiyan pêk tê, herêm ji terora DAIŞ’ê rizgar kir. Di berdewamê de jî hat destnîşankirin ku îro li hemberî wan êrîşa leşkerî tê kirin û ew van êrîşan qebûl nakin. Hat diyarkirin ku dê ev êrîş bibin sedema vegera çeteyên DAIŞ’ê.
Banga seferberiyê
Daxuyanî wiha dom kir: “Em wek eşîrên li Cizîr û parêzgeha Dêrazorê, vê destwerdana leşkerî şermezar dikin û bang li hêzên cîhanê dikin ku rawestînin û çareseriyeke siyasî û dîplomasî bibînin. Her wiha çi dijminatiyê ji her aliyekî ve jî red dikin. Em û ciwanên me yên şervan seferberiyê ji bo parastina xakên me yên êlên erebî yên li Dêrazor û Hesekê, radigihînin.
Em bang li Konseya Ewlekariyê û civaka navdewletî dikin ku ji bêdengiya xwe derkevin û çareseriyê ji êrîşên Erdogan re yên li ser sînorê bakurê Sûriyeyê yên bi armanca qirkirina etnîkî, bibînin.” HESEKÊ
