Leyla Kaçar, dayika Ahmet Kaçar ku li Girtîgeha Bandirmayê di greva birçîbûnê de ye, ji bo piştgiriyê bide kurê xwe dest bi greva birçîbûnê kir. Dayikê diyar kir ku heta tecrîd bi dawî nebe dê çalakiya wan û zarokên wan bidomin
Çalakiya greva birçîbûnê ya hevseroka KCK’ê Leyla Guven ku li dijî tecrîdkirina Rêberê Gelê Kurd Abdullah Ocalan da destpêkirin di roja 128’an de didome. Her wiha bi heman daxwazê li girtîgehan jî çalakiya greva birçîbûnê ya girtiyan didome. Yek ji van girtiyan jî Ahmet Kaçar (29) ku li Girtîgeha Jimare 2’yan a Tîpa T a Bandirmayê ji 1’ê adarê ve li dijî tecrîdê di greva birçîbûnê de ye.
Dayika wî Leyla Kaçar (45) diyar kir ku kurê wê 12 sal in girtiye û wiha got: “Xwê, şekir û tiştên din nadin zarokên me. Ev zarok tenê ne zarokê min e. Zarokên me hemûyan e. Ger niha em dengê xwe li dengê van zarokan zêde nekin, piştî darbest derkevin tu maneya wê tune ye.”
Dest bi çalakiya greva birçîbûnê kir
Di axaftina xwe de dayikê destnîşan kir ku roja kurê wê dest bi greva birçîbûnê kiriye wê jî dest bi grevê kiriye û wiha domand: “Heta çalakiya zarokên me dewam bike dê yê min jî dewam bike. Daxwaz û fikra zarokên me çi be ya me jî heman tişt e.”
Heta tecrîd bi dawî nebe dê çalakî bidome
Kaçar diyar kir ku divê tecrîda li ser gelê kurd û Ocalan bi dawî bibe û wiha domand: “Em çar kes nikarin bên cem hev û behsa zarokên xwe bikin. Wexta em behs bikin demildest em tên binçavkirin. Ev faşîzm e. Lê li me jî bidin û têxin girtîgehan jî em ê dev ji doza xwe bernedin. Heta tecrîd bi dawî nebe dê çalakiya me û ya zarokên me dewam bike.”
Her wiha di dawiya axaftina xwe de dayikê bang li her kesî kir ku deng bidin dengên girtiyan. SÊRT
