Faşîstên tirk ên li Tirkiyeyê ne bes e vê carê li Ewropayê êrîşî ser kurdan kirin. Kurdên ku pîrozbahiya Newrozê ya li bajarê Leûvenê yê Belçikayê vedigeriyan, dema ku bi konvoyê di bajaroka Heûsden-Zolderê derbas dibûn rastî êrîşa bi sedan faşîstên tirk hatin.
Faşîxstên tirk gelek wesayît xera kirin û êrîş birin ser bi dehan kesî ku xwe li malekê girtin. Ji dîmenên ku di medya dîjîtal de hatin weşadin tê dîtin ku koma nijadperest hewl dide ku bi tekbîrê bikeve hundirê malê, lê polîs nahêlin.
Şahidan diyar kirin ku faşîstan hewl dan derdora 40 kesên ku xwe li malekê girtin bişewitînin. Li gorî agahiyan gelek kes birîndar bûn, lê agahiyên şênber bi dest neketin.
Di medya dîjîtal de dîmenên ciwanekî ku hewl didan wî lînç bikin hatin weşandin. Di dîmenekî cuda de jî hin kes li erdê dirêjkirî ne. Li hemberî kesên li erdê dirêjkirî jî bi zimanê tirkî heqaretên nijadperestî tê kirin. Faşîstan her wiha semboleke kesk û sor û zer û ala herêma Kurdistanê şewitand.
Piştî êrîşa faşîstan gelek kurd çûn cihê bûyerê û êrîş şermezar kirin. Kurdên ku çûn cihê bûyerê kesên li malekê asê mabûn rizgar kirin.
Kurdan li bajarok çalakiya şermezarkirinê lidar xistin û xwestin ku êrîşkarên faşîst tavilê bêne girtin û cezakirin. Her wiha di medya dîjîtal de wêneyên hin faşîstên hatin tespîtkirin û weşandin.
Piştî êrîşê gelek tîmên polîsan ber bi cihê bûyerê ve hatin veguhastin û helîkoptereke polîsan li ser bajarokê geriya.
