FEDA vera hêrişanê ke demê peyênî de hemverê Elewîyan de zêdîyayî razînêbîyayîş ramot. Eşkerayîye de ame vatene ke ma tarîx ra zanê ke kamî beranê Elewîyan nîşan kenê û kamî erzenê bananê Elewîyan ser. Ma xo vîra nêkerd û do çirey xo vîra nêkerê
Federasyonê Elewîyan ê Demokratîkî (FEDA) derheqê hêrişê vera endamê Heyetê Rayberdişî yê Cemxaneyê Duzgun Baba yê Qisle Hakki Aradagi de eşkerayîyêka nuştekîye daye û bale ant ke Elewîyî dewrê peyênî de reyna benê hedefê hêrişan
Eşkerayîya FEDA ra tayî cayî wina yê: “Cayanê bimbarekanê Dêrsimî ra merkezê ocagê Kureyşanî yê Qisle ya Dêrsimî de keyeyê yew ganê ma rê sereştiş ameyo kerdene bizor ey ra ameyo waştene ke rayîrê xo yê heqî ra agêro. Çîyo winayên nêno famkerdene. Vijdanê ma naye qebul nêkeno. Keyeyê her Elewîyî cemxaneyêk o. Kam ke vano ez Elewî ya sebeb çi beno wa bibo nêeşkeno bierzo keyeyêk ser. Bêriza çew nêeşkeno bikewê cemxane. Ma tarîx ra zanê ke kamî beranê Elewîyan nîşan kenê û kamî erzenê bananê Elewîyan ser. Ma xo vîra nêkerd û do çirey xo vîra nêkerê.”
Eşkerayîye de bale ameye antene hêrişanê vera Elewîyan ê ke demê peyênî de zêdîyayî ser û nê ameyî vatene: “Demê peyênî de bi medotanê cîya cîyayan vera Elewîyan hêrişî yenê kerdene. Yeno waştene ke Elewîyî xo mîyan de têmîyan bikewê û yewbînan ra bibê cîya. Elewîyî prosesêkê zehmetî ra ravêrenê. Elewîyê ke vera yezîdan safê mazlûman de pirananê xo yê heqî pare kenê, reyna benê hedefê hêrişan. Dewlete verî dîyanet viste dewre û waşt ke bi pere Elewîyan bixapîno. Heman prosesî de berê serekanê cemxaneyan ameyî nîşankerdene. Reyna tam nê wextî de qeleya peyêne ya Elewîyan Dêrsim de no hêriş ame meydan. No yeno no mana ke dewlete vana şima sey ma nêkerd, verê ma de çok nêda, ma zî bizor sey xo kenê. Wa herkes bizano ke ma dewaya xo ra fek vera nêda û nêdanê. Hêrişkarê ke bi dewleta xorî têgêrenê wa bizanê ke no do cayê înan de memano. Ma do vera zîhnîyeto ke wazeno Elewîyan lete bikero û asîmîle bikero xoverdayîş xurt bikerê û ser bikewê.” Çime: ANF
