FEDA qurbanê Qirkerdişê Dêrsimî yad kerdî û bale ante ser ke Dêrsim rixmê zulmêkê girdî serê nêna ro.
Federasyonê Elewîyê Demokratîke (FEDA) bi wesîleya serrgêra Qirkerdişê Dêrsimî eşkerayîyêka nuştekîye daye.
Laboratuwarê Qirkerdişî
Eşkerayîye de ame vatene, “Dêrsim dima qirkerdişê fîzîkî, laboratuwarê qirkerdişî yê kulturkî yo zî. Çareserîya peyêne ya dewlete ver bi 4ê Gulane 1937 de bi qerarê Heyatê Wezaretî, bi hawayêkê fîîlî ameye caardene; operasyonê qirkerdişî yo ke 2 serran ra zêdetir do dewam bikerdêne, ame destpêkerdene. 70 hezarî ra zêdetir merdimê ma bi gazanê kîmyayewî yê ke Almanya ra ameyê herînayene û bi teyeranê ke Amerîka ra ameyê herînayene, ameyî qetilkerdene û bado zî bi surginan no qirkerdişê kulturkî ameyo dewamkerdene.”
Ganî ozur bêro waştene, belgeyê qirkerdişî bêrê eşkerakerdene
FEDA vatişê Seyîd Rizayî, “Ez vera hîle û zuranê şima de pê şima nêeşkaya no mi rê bi derd, labelê mi zî verê şima de cok nêşana erd, wa no zî şima rê bibo derd.” Ard vîrî û vat, Dêrsim xoverdayîşêko winayêno ke bi nê vatişan tarîxî ra ameyo nuştene.
FEDA qurbanê qirkerdişî ard vîrî û waşt ke çîyê ke ameyê ciwîyayenê platformanê mîyanneteweyî de sey ‘qirkerdiş’ bêrê naskerdene, cayê gorê Seyîd Rizayî û hevalê ci bêrê eşkerakerdene û dewleta Tirkî bi parekerdişê belgeyanê nimitkîyan ê derheqê qirkerdişî şarê Dêrsimî ra ozur biwaza.
