Endamên Federasyona Yekitiyên Elewiyan ên Fransayê çûn serdanan çalakgerên li Strasboûrgê û diyar kirin ku ew piştgirî didin çalakgeran û dê li hemberî pêvajoya heyî bêdeng nemînin
Greva birçîbûnê ya bêdem û bêdorveger a li bajarê Strasboûrg Fransayê ji bo rakirina tecrîda li ser Rêberê Gelê Kurd Abdullah Ocalan pêk tê, di roja 36’an de ye. Piştgirî û serdana ji bo çalakgeran jî didome.
Endamên Federasyona Yekitiyên Elewiyan a Fransayê jî çûn serdana çalakgeran û piştgiriya xwe anîn ziman. Li ser navê endaman hevserokê federasyonê Hakan Akça axivî.
Akça diyar kir ku ew piştgiriyê didin çalakiyê, lewma hatine serdana wan û hemû kesên ku ketine çalakiya greva birçîbûnê silav kirin.
Di axaftina xwe de Akça bal kişand ser komkujî û asîmîlasyona heta niha li kurdan û elewiyan hatiye kirin û wiha domand: “Em ê li dora mafên xwe yên gerdûnî ku li ser bingeha azadî û aştiyê diparêzin, li hev bicivin û têkoşîna xwe ya ji bo kurdan û elewiyan bidomînin.”
Akça bang li rayedaran kir ku bersivê bidin daxwazên çalakgeran û axaftina xwe wiha bi dawî kir: “Em piştgiriyê didin çalakiyê û di vê demê de em ê bi hev re tevbigerin. Leyla Guven ji bo bidawîbûna tecrîdê di greva birçîbûnê de ye. Em çalakiya wê silav dikin û bi navê Federasyona Yekitiyên Elewiyan ên li Fransayê dibêjin, em ê li hemberî pêvajoyeke wiha bêdeng nemînin.”
Li ser navê çalakgeran jî hevserokê KCDK-E’yê Yuksel Koç axivî. Koç diyar kir ku têkoşîna wan ne tenê ji bo gelê kurd e, ji bo hemû bawerî û gelan e û got ku tecrîd li her kesên demokrasiyê dixwazin tê ferzkirin.
Her wiha Koç bang li her kesê kir ku li dijî tecrîdê çalakiyan li dar bixin, faşîzma Erdogan hilweşînin û demokrasiyê biparêzin. STRASBOÛRG
