Ji Fermandarên Biryargeha Navenda Parastina Gel (NPG) Amed Malazgîrt bi rêya cîhaza ragihandinê ji gerîlayên li çeperên berxwedanê re axivî.
Di dîmen de ku ji aliyê Gerîla TV ve hate weşandin Amed Malazgîrt şerê 47 rojan ên li Zap, Avaşîn û Metînayê bi berfirehî nirxand, qad bi qad qala performansa gerîla ya li dijî dagirkeriyê kir.
Amed Malazgîrt ev tişt anî ziman: “Di nava 47 rojên operasyonê de şerekî mezin hate meşandin. Dijmin hemû teknîka xwe, hêzên taybet di asta seferberiyê de tevlî vî şerî kir. Hemû derfetên xwe niha xistiye vî şerî. Têrê nekiriye, bermahiyên DAIŞ’ê, çete û kontra xistiye nava vî şerî, dixwazin bi ser bikevin. Li hemberî vê hevalan bi rastî jî ji destpêka operasyonê û heta niha bi fedakariyeke mezin, bi ruhekî fedaî yê PKK’ê bersiv dan û ji wê rojê û vir ve her roj şerekî dijwar dimeşe. Di nava şert û mercên zehmet de fedakarî û berxwedana hevalan, çalakiyên ku li hemberî dijmin dike, em hemû hevalan silav dikin û serketinên mezintir dixwazin.”
Fermandar Amed Malazgîrt destnîşan kir ku dijmin li bin ketiye, ji bo vê binketina xwe binixumîne wê şer berfirehtir bike û wiha got: “Şerê tê meşandin, ne şerekî ji rêzê ye. Meseleya hebûn û nebûnê ye. Meseleya gelê Kurd û Kurdistanê ye.”
Fermandar Amed Malazgîrt işaret bi pêngavên şoreşgerî yên gerîla kir û ev tişt got: “Bi van pêngavan re wê dagirkeriya dewleta Tirkiyeyê li Zapê bişikê.”
