Fermandaranê YJA-Starî ra Hêzil Ozgure derheqê hêrişanê îşxalî yê vera Herêmanê Pawitişî yê Meyda de bi rayîrê cîhazê îrtîbatî tîmanê gerîlayan de qisey kerd.
Mesajê Hêzil Ozgure wina yo:
”Hêrişê îşxalî 26 rojî yo dewam kenê. 14ê nîsane ra nata hêrişê hewayî û bombardumanî yenê kerdene. Dewleta tirke ke pê teknîkê xo bawer kerdêne vana qey cade herême bivisna destî la wina nêbi. Coka Wezîrê Karanê Zereyî neçare mendo ke eşkerayîyan bido. Xoverdayîşê embazan na netîce vete werte. Xora kêmasîyê ma zî est ê û ma nînan ercnenê. La raşta zî dişmen verî Zap û Avaşîn de şoq bi. Xora Erdogan û Hulusî Akarî noqtaya operasyonî ya Çelê de fermandaranê operasyonî de pêvînayîş kerd. Înan uca de îtîraf kerd ke şehîdê înan est ê. Goreyê çimeyanê herêmîyan zî hende leşkerê înan ê birîndarî est ê ke nêweşanxaneyan de ca nêmendo. Embazanê ma bi ruh û atmosferêkê zaf cîyayî derbê giranî dayî dişmenî ro. Ma hertim deyndarê embazanê xo yê şehîdan ê.
Ma nê operasyonî tena sey operasyonê vera Zap û Avaşînî nêercnenê. Dişmen xora nika zîndanan de zî hêrişê embazanê ma keno, şarê ma qir keno, dadîyanê ma erdî ra kaş keno. Yanî vera şarê kurdî şerêko topyekûn yeno kerdene. Her çî ra ver vera Rayberê ma şer yeno kerdene û destûr nêdîyeno ke ey de pêvînayîş bêro kerdene. Seba ke verê înan de gerîlayî est ê, nika nêeşkenê zerar bidê Rayberê ma. Proses zaf hesas o; ganî ma bi baldarî têbigêrê. Ê wazenê verî gerîlayan dima zî Rayberîye çin bikerê. Coka ma nê şerî rê vanê şerê merg û mendişî.
Seba şiknayîşê hêrişanê dişmenî ganî na hesabê nê şerê emrdergî bikerê. Xeta îxanetî pê pêro îmkananê xo verê leşkeranê tirkan akerdo ke hêrişê Kuro Jahroyî bikerê. Ma têna verd dişmenêkî nê vera teknîkê NATOyî û xayînan zî şer kenê. Rûsya cade Ukrayna îşxal kerde la Tirkîya 26 rojî yo nêeşkaye gamêke aveer bierza. No xêrê xoverdayîşê embazan de qewimîya. Hetê bînî ra tîmanê hereketînan nêverda ke dişmen xo nêzdîyê tunelanê şerî bikero. Ma nê embazanê xo zî fîraz kenê.
Ganî ma emser qetî ser bikewê. Selahîyetdarê dewleta tirke her eşkerayîye de vanê ‘Nêbeno ke ma apey gamêke bierzê.’ Nê eşkerayîyî qelsîya înan mojnenê. Eke embazî hunerê xo bikerê ma do bieşkê dişmenê faşîstî nê erdî de bişiknê. Ganî ma wina bikerê ke dişmen nêeşko gamêke zî bierzo. Ganî ma operasyonê înan ê ‘Kîlîtî’ bikerê kilîdo ke berê Îmraliyî abibo.
Ganî embazî xo bipawê û nêbê hedefê teknîkî. Ganî ma hem bidê piro, hem zî xo bipawê. Heta ke înîsîyatîf destê ma de bibo, dişmen do bizano ke sîle biwero û tim pozîsyonê pawitişî de bibo. Êyê ke nê pozîsyonî de yê zî neçare yê ke bin bikewê. Dişmenî vera ma çekê kîmyewîyî şuxilnayî. Ma xora hêrişanê verênan de xeylêk tecrubeyî vistî destî. Coka verê ma de astengîyêke çin a. Ma zanenê ke embazî hîna bi profesyonelî û bi tedbîrî tewrê nê şerî bibê. 26 rojî yo ma xo îsbat kerdo. Ez xoverdayîşê tîmanê hereketînan, ruhê hêrişî yê embazan selam kena; her kesî rê serkewtiş wazena.” Çime: ANF
