Komîteya Paştdayîşê Keyeyanê Şehîdan a PKKyî eşkerayîyêka nuştekîye daye û pare kerd ke Fermandar û milîtano rayber ê PKKyî Abdulrahman Hamo (Dozdar Hamo) menga teşrîna peyêne ya 2019î de hêrişêkê hewayî yê Herêmanê Pawitişî yê Medya de şehîd bîyo.
Eşkerayîya Komîte wina ya:
”Fermandaro ercîyaye, milîtano rayber ê partîya ma û temsîlkarê erjanê tarîxî û komunalan embaz Dozdar Hamo (Abdulrahman Hamo) menga teşrîna peyêne ya 2019î de hêrişêkê hewayî yê vera Herêmanê Pawitişî yê Medya de şehîd bi. Ma şexsê keyeyê embaz Dozdarî de sere de şarê Rojawanî rê pêro partîya ma, embazanê ma û şarê ma rê serweşîye wazenê.
PKK sey partîya raybere ya şarê Kurdîstanî 40 serran ra nata têkoşînê azadîye keno. Nê têkoşînî Vakurê Kurdîstanî de dest pêkerd û pêro Kurdîstanî ra vila bi, pêro parçeyanê Kurdîstanî ra kurdan wayîrê nê têkoşînî vejîyayî.
Xeta PKKyî kesayetê ercîyayeyî û kesayetê komelkîyî vetî werte. Şehîdanê ma bi pratîk, tewir û keda xo kerd ke partîya ma biba pîlêr, hêzêr û aver şora. PKK îdîa keno ke rayberîya cuya azade bikero. Na îdîa û hêzê PKKyî sayê Rayber Apoyî û şehîdanê ma de ya. Embaz Dozdar Hamo zî bi cu, tewrbîyayîş, pratîkê xo na îdîa kerde zixmêr.
Embaz Dozdar serra 1969î de Efrîn de dadîya xo ra bîyo. Embaz Dozdar Efrîn de ke merkezê erjanê kurdan o, bi pîl, hema ciwanîya xo de qirkerdişê vera kurdan dî û bire daye ke seba azadîya Kurdîstanî şer bikero. Embaz Dozdar bi nê hawayî serra 1990î de tewrê PKKyî bi. Embaz Dozdarî dima warê Rayberîye de Rayber Apoyî ra perwerde girewt, têkoşîn de xo aver berd û serra 1992î de vejîya koyanê Kurdîstanî. Bi serran embaz Dozdar rixmê pêro zehmetîyan şer kerd, ciwanîya xo de bi fermandar. Bi serran warê leşkerîye de xebitîya, fermandarîye kerde, tewrê xeylêk çalakîya bi û dişmenî ra qesasê xo girewt.
Embaz Dozdarî bi serran HPG-BÎMî de rayberîya xebatan kerde, rolê pîlî girewtî xo ser. Embaz Dozdar her tim û her xebate de amade bi û tim bi tewiranê xo mîsalê milîtanîye mojna. Embaz Dozdarî keda pîle daye Şorişê Rojawanî. Embazîya ci ya bi cinîyan asta ci ya milîtanîye kerde berze.
Ma bi şehadetê ey zaf xemgîn ê. Ma dejê xo pê tewrbîyayîşê xebatan, serkewtişan do kêm bikerê. Qesasê embaz Dozdarî do faşîzm birijno. Wayîrvejîyayîşê vîrameyîşê ey şiknayîşê tecrîdî, rijîyayîşê faşîzmî, awankerdişê azadîya Kurdîstan û Rayber Apoyî yo û heman wextî de zî pawitişê Şorişê Rojawanî yo.
Şehîdê ma rayberê raştikênî yê têkoşînê ma yê. Şehîdî ewro, vizêr û sibayê ma yê. Ma seke embazan Rayber Apoyî rê vat, keyeyanê şehîdan û şarê xo rê vanê; wa çimê şima pey de nêmanê, ma do paradîgmaya Rayber Apoyî pêro Rojhelatê Mîyanênî de awan bikerê, Kurdîstan azad bikerê, Rayberîya azade reyde biciwîyê. Sozê ma yê seba şehîdan, sozê ma yê seba şarê ma, Rayberîya ma û tarîxî yo.
Embaz Dozdarî Şorişê Rojawanî ra îlham girewt û bi coşî keda pîle daye ci. O zerrî ra perwerê erd, kultur û komelê Efrînî bi. Azadkerdişê Efrînî layîqbîyayîşê vîrameyîşê ey o.
Ma şexsê embaz Dozdar Hamoyî de pêro şehîdanê xo bi rêzdarî û heskerdişî yad kenê û sozê xo yê seba Kurdîstanê azadî û Rayberîya azade dibare kenê. Ma venga pêro kurdan, cinîyan, ciwanan danê ke vera faşîzmî têkoşîn bikerê, têkoşîn pîl bikerê, tecrîdê vera Rayberîye bişiknê, qesasê şehîdan bigêrê, Rayberîye û Kurdîstan azad bikerê.” Çime/ANF
