Festîvala Xoza û Kulturî ya Munzurî ya 20. di serrî yo janê Korona ra nêamebî kerdene û emser do 21-22-23-24ê temmuze de bêra kerdene. La Walîtîya Dêrsimî kena ke pê qedexeyan festîvale asten bikera. Walîtîya Dêrsimî rayraşîyayîşê ver bi Meydanê Seyîd Rizayî, konserê Grup Yorum û Grup Îsyan Ateşî qedexe kerdî. Komîteya Amadekarîye ya Festîvale derheqê qedexe û astengîyanê walîtîye de eşkerayî da.
Eşkerayî Salona Kombîyayîşan ya Şaredarîya Dêrimî de ame viraştiş. Eşkerayîye de Şaredarê Dêrimî Fatîh Mehmet Maçoglu qisey kerd û wina vat: “Ganî bêro zanayîşe ke Festîvala Xoza û Kulturî ya Munzurî seba pawitişê tarîx, kultur, ziwan û xozayê şarê Dêrsimî vejîyaya werte. Ma qedexeyê no zîhnîyeto qedexekar qebul nêkenê. Programê ma seke ameyo eşkerakerdiş do dewam bikero.”
