Hikûmeta Iraqê hewl dide derdora wargeha penaberan ya Mexmûrê bi têlan dorpêç bike. Bi dehan wesayîtên zirxî li derdora wargehê girtine û dixwazin û derdora wê bi têlan dorpêç bikin. Berxwedaniya gel a li dijî dorpêçê jî berdewam dike.
Fermandarê Xwebexş ê pêşmergeyên YNK’ê yê Herêma Mexmûrê Xazî Feysel, derbarê hewildanên dorpêçkirina Wargeha Penaberan a Şehîd Rustem Cudî de ji Rojnews re axivî û got: “Şêniyên Wargeha Mexmurê ji ber zilma dewleta tirk di salên 1990’î de bi çavdêriya rêxistinên mafên mirov û Neteweyên Yekbûyî li vê kampê bicih bûne. Lê mixabin li şûna ew werin parastin, hertim astengî ji bo wan tê derxistin.”
Xazî Feysel diyarkir ku hikûmeta Iraqê bi hêzek mezin a leşkerî dor li kampê girtiye û dixwaze li dora kampê kuleyan dayne. Feysel got: “Şêniyên wargehê li dijî vê hewildanê dest bi xwepêşandanê kirine û rê nadin hêzên Iraqê derbasî nava wargehê bibin.”
Feysel destnîşankir ku ji beriya niha jî hikûmeta Iraqê heman hewildan kiribû lê bi navbeynkariya YNK’ê rewş aram bibû û dest bi danûstandinan hatibû kirin. Xazî Feysel got, li aliyê din jî PDK dorpêça li ser şêniyên wargehê ya ji bo çûna Hewlêrê berdewam dike û rê nade kesên nexweş jî derbas bibin.
Di dawiyê de jî Xazî Feysel got: “Dewleta tirk bi berdewam bi balefiran êrîşê şêniyên wargehê dike. Pêwîste li şuna dorpêçê wargeh ji êrîşên asîmanî yên dewleta tirk û êrîşên DAIŞ’ê were parastin.”
