Seroka THÎV’ê Prof. Dr. Şebnem Korur Fîncanci di danişîna xwe de parastina xwe kir û wiha got: “Min heqaret li kesî nekiriye, min îşkenceyê îfşa kir.”
Seroka Weqfa Mafên Mirovan a Tirkiyeyê (THÎV) Prof. Dr. Şebnem Korur Fîncanci, di serdema Çalakiyên Parka Geziyê de tweet parve kiribû û bi hinceta parvekirinê bi îdiaya ‘Heqaret li Serokkomar Erdogan kiriye’ doz lê hatibû vekirin. Danişîna sêyemîn a doza Fîncanci li Dadgeha Anadoluyê ya Stenbolê hat dîtin. Fîncanci û parêzera xwe Oya Merîç Eyuboglu û parêzerê Erdogan Gokhan Arslanoglu di danişînê de amade bûn.
Di daneşînê de Fîncanci got ku dema wê tweet parve kiriye Erdogan serokwezîrê wê demê bûye û gotinên ‘Polîsên me destan nivîsandin’ û ‘Min ferman da’ bi bîr xist. Fîncanci anî ziman bûyerên wê demê qewimîn wek ‘komkujiyê’ bûn û wiha got: “Min heqaret li kesî nekiriye, min îşkenceyê hatibû kirin aşkere kir.”
Her wiha Fîncanci sûcdariya li ser xwe qebûl nekir û berata xwe daxwaz kir.
Parêzer Oya Merîç Eyuboglu jî miwekîla xwe parast û ev tişt anî ziman: “Ez jî tev li beyanên miwekîla xwe dibim. Tiştek di cih de gotiye. Jixwe hikûmeta heyî jî qewimînên wê demê rexne kiribûn.”
Piştî parêzera Fîncanci parêzerê Erdogan axivî û xwest Fîncanci bê cezakirin.
Her wiha piştî parastinan dadgehê danişînê taloqî 17’ê adara 2020’an kir. STENBOL
