Endamanê Meclîsê Cinîyan ê HDPyî yê Amedî û Têgêrayîşê Cinîyan ê Azadan (TJA) vera qetilkerdişê Jîna Emînî verî Berê Mêrdînî yê qezaya Sûrî yê Amedî de eşkerayîye daye û dima zî Sûran de fotografê Jîna daliqnayî.
Vervatoxa Meclîsê Cinîyan ê Partîya Demokratîke ya Şaran (HDP) Ayşe Acar Başaran, Hetkara Serekwekîla Koma HDPyî Meral Daniş Beştaş, Vervatoxa Meclîsê Ciwanan ê HDPyî Dêrsim Dag, Wekîlî Feleknas Uca, Remzîye Tosun, Dîlan Dîrayet Taşdemîr, Hemsereka ESPyî Beycan Taşkiran û xeylêk kesî tewrê çalakîye bîyî. Eşkerayîye ra dima cinîyan pankarta bi nuşteyê ‘Serewedaritişê Cinîyan Selam Kenê. Cinîye, Cuye, Azadîye’ daliqnaye.
Eşkerayîye ra verî polîsan waşt ke cinîyan asteng bikerê. Rixmê astengkerdişê polîsan zî cinîyan Bircê Kênayan de pankarte daliqnaye.
Çalakîye de Ayşe Acar Başaran qisey kerd û pare kerd ke cinîyî Amedî ra heta Rojhelatê Kurdîstanî vera sîstemê serdestîya camêrdan vengê xo berz kenê û xo xo ver danê.
Çalakîye pê tîlîlî û çepikan qedîyaye
Meclîsê Ciwanan ê HDPyî yê Riha zî seba Jîna çalakîyêka rayraşîyayîşî kerde. Cinîyan ê ciwanan çalakîye de sloganê sey ‘Cinîye, Cuye, Azadîye’ û ‘Biciwîyo Xoverdayîşê Rojhelatî’ vatî. Meclîsê Ciwanan medyaya dîjîtale de zî no mesaj pare kerd: “Ma seba Jîna Emînî Riha de çalakîyêke kerde. Ma venga pêro şarê xo danê ke bibê parçeyêkê serewedaritiş û xoverdayîşê Rojhelatî.” AMED
