Serokê giştî yê AKP’ê Erdogan duh bi daxuyaniyekê bersiv da gotinên serokomarê Fransayê Emmanuel Macron û got; ‘tu pêşî li mirina mejiyê xwe binêre.’ Fransayê jî ev gotin weke ‘heqaret’ pênase kir û bang li sefîrê tirk kir
Dewleta tirk ji bo ku piştgiriyê bidin êrîşên wê yên qirkirinê yên li dijî kurdan, bang li endamên NATO’yê kiribû. Li ser vê bangawaziyê jî Emmanuel Macron bersiv dabû. Serokê giştî yê AKP’ê Tayyîp Erdogan jî heqaret li Macron kiribû.
Li ser heqaretên Erdogan, Wezareta Karên Derve ya Fransayê bang li sefîrê tirk Îsmaîl Hakki Mûsa kir û jê xwestin ku li ser gotinên Erdogan daxuyaniyekê bidin. Herî dawî wezaretê di 9’ê cotmehê de li ser êrîşa dewleta tirk a li dijî Rojava bang li sefîrê tirk kiribû.
Hêjayî gotinê ye Erdogan di daxuyaniya xwe de ji Macron re gotibû; ‘Tu di pêşiyê de li mirina mêjiyê xwe binêre.’ Li ser vê yekê jî Qesra Elysêeyê jî daxuyanî da û gotinên Erdogan weke ‘heqaret’ pênase kir.
Macron di roja pêncşemê de wiha gotibû: “Tirkiye li Sûriyeyê bi ‘min kir û bû’ operasyonê dike. Li ser vê jî divê li bendê nebe ku şirîkên NATO’yê destekê bidinê.” Macron meha bihurî jî ji kovara The Economîstê re axivîbû û got: “Niha tişta ku em dijîn, mirina mejî ya NATO’yê ye. DYA’yê pişta xwe daye projeya Ewropayê.”
Piştî ku Macron gotibû NATO wê destekê nede dagirkeriya tirk a li Rojava, Erdogan duh gotibû; ‘Birêz Macron, tu pêşî li mirina xwe ya mêjî bipirse. Ne hedê te ye ku Tirkiyeyê ji NATO’yê derxînî.” PARÎS
