Komîteya Vernîgirewtişê Muameleyo Xirab û Îşkenceyî ya Ewropa (CPT) çend rojî verê cû raporê xo yê derheqê Îmraliyî de pare kerd û da zanayene ke Îmrali de îşkence û tecrîd esto. Bi nê hawayî tecrîd warê mîyanneteweyî de ame qeydkerdene. Avûkatanê Baroyê Stenbolî ra Feyzî Çelîk û îdarekarê OHDyî Medenî Gur derheqê raporê CPTyî de qisey kerdî.
Îdarekarê Şubeyê Wanî yê Platformê Huqûqnasanê Azadîwaştoxan (OHD) Medenî Gurî vat: ”Birêz Ocalan keye û avûkatanê xo nêvîneno. No bi xo tecrîd û peygoşîyêka giran a. Qanûn de cayê ci çin o. Goreyê qanûnî tepişteyî her hewte pêvînayîş bikerê. Bi raporê CPTyî sîstemê Îmraliyî sey ‘tecrîd’ ame pênasekerdene. Eke naye ra pey dewletê mîyanneteweyî derheqê tecrîdî de çîyêk nêkerê ê do hetê huqûqî ra bêrê hukmkerdene.”
‘CPTyî sey binpaykerdişê heqî pênase kerd’
Avûkatê Baroyê Stenbolî Feyzî Çelîkî vat: ”CPT seba ke îşkence û têgêrayîşê xirabî werte ra wedaro esto. CPTyî canêardişê pêvînayîşî sey binpaykerdişê heqî pênase kerd. Tirkîya semedê peymanan ra neçar a ke goreyê CPTyî têbigêrê. CPT binpaykerdiş do pêşkêşê Konseya Ewropa bikero û Konseye hînî eşkeno Tirkîya hîşyar bikera. Heta sey ambargo beno ke Tirkîya konseye ra bêra vetene. Raporê CPTyî de têna Îmrali ra nê bêhuqûqîye ra yena behskerdene.” WAN
