Şukran Aydina ke seba tecrîd wedarîyo 30ê Nîsane ra nata rojeyê mergî de ya va: “Ganî her ca bibo wareyê çalakîye û xoverdayîşî. Ganî şarê ma hemeyê barî serê milê mayan de nêverdo.”
Grevê vêşanîye yê seba wedartişê tecrîdê serê Rayberê Şarê Kurdî Abdullah Ocalanî dewam kenê. Seba ke tecrîdê serê Ocalanî wedarîyo 30ê Nîsane de 15 û vizêr ra nata zî 15 tepişteyanê bînan ê PKK û PAJKî dest bi rojeyê mergî kerd. Şukran Aydina ke 1ê Adare ra nata Zîndanê Bakirkoyî yê Cinîyan ê Girewteyî de grevê vêşanîye yê bêdem û bêagêrayîşî de bîye, mîyanê a kome de ya ke 30ê Nîsane ra tepîya kewtîbî rojeyê mergî. Aydina ke no 12 serrî yo zîndan de ya, bi rayîrê keyeyê xo derheqê xoverdayîşê grevê vêşanîye de vengdayîş kerd.
Vengdayîşê Şukran Aydine wina yo:
“Seke yeno zanayene, no şeş mengî yo bi serkêşîya hemra Leyla Guvene çalakîya grevê vêşanîye dest pêkerdo. Çalakîya m abi coş, bi heyecan û xoverdayîşêkê pîlî dewam kena. Dimayê 30ê Nîsane ra ma çalakîya xo resnaye dereceya tewr berze. Zîndananê cîyayan ra ma 15 embazan dest bi rojeyê mergî kerd. Ma peyrewê ruhê 14ê Temmuze, şagirdê Sarayan, Delalan, bi qerardarîyêka xeylî pîle, bi heyecanêkê xeylî pîlî nê xoverdayîşê xo domnenê. Heta ma nêresê netîce, heta ke ma serkewtişî bi dest nêfînê vindertiş ma rê çino. Ma sere de qerarê xo da ma sey fedaîyê Rayber Apoyî, seba şikitişê tecrîdî erey kewtê. La hetêna ra heta ma nê tecrîdê serê Serekîye bişiknê, heta ma biresê Serekîye, heta ma şertanê azadan seba Serekîye biafernê, tu vindertiş seba ma çino. Beno ke no pêvînayîşê 2ê menge bi Serekîye dir bêro kerdene. Faşîzm neçar mend ke bi Serekîye pêvînayîş bido kerdene, la ma merdimê winayênî nêyê ke bi pêvînayîşê reyêk dir bêrê xapênayene. Çew hendî bin ê nizdbîyayîşan nêeşkeno ma bixapêno. Dimayê 8 serran ra girewtişê hayîdarîye ya Serekîye, şinawitişê vengê Serekîye moralêko xeylî pîl da ma. Na kêfweşîyêk a. Ma tecrîd tayê şikit, no pîlîya serkewtişê çalakîye ramojneno. La ganî her kes rind bizano ke heta sîstemê faşîzmî yê Erdogan-Bahçelîyî nêro perçekerdene, ma xo nêresnê Serekîye, şertê cuya azade Serekîye rê nêrê afernayene ma nêvindenê.
Naye dir girêdaye bi rastî zî lazim o ke şarê ma xoverdayîşê xo hîna bikero pîl. Her ca bikero wareyê çalakîyan, serhildanan. Taybetî ma çalakwanî xoverdayîşê mayanê xo silam kenê, ganî ma nê barî tena serê milê mayan de meverdê. Ma çalakwanî mayan pîroz kenê. ma soz danê ke cuya azade înan rê xelate bikerê. Ma destanê înan ê pîrozan maç kenê. La lazim o ke ciwanê m ana bêvengîye rê peynîyêk bîyarê û bendewarîyan rê bibê cewab. Hende hêrişê barbarî serê mayanê ma de yenê kerdene, hêrişê faşîzanî yenê kerdene, ma ciwanê ma do bêveng bimanê? Do cewabêkê xurtî bidê, ma nê ra bawer ê. Reyna ma wazenê ke tekrar bikerê, ma resayê dereceyêk ke heme embazî bi qerardarîye xoverdayîşî dewam kenê. Ma nê ra bawer kenê ke ma do serkewtişêkê pîlî bi dest bifînê. Ma nê sîstemê faşîzan ê Erdogan-Bahçelîyî perçe perçe bikerê. Wa şarê ma ma ra bawer bo, wa xo ra bawer bo. Wa paweyê çewî mebo, wa qerar bido. Wext wextê qerardayîşî yo. Ma wazenê reyna qerardarîya xo bîyarê ziwan. Şima rê serkewtiş wazenê.” STENBOL
