Maya Veysel Gulerî yo ke Zîndanê Kalkandere de grevê vêşanîye de yo, Hayat Gulere vat ke ganî mesajê xoverdayoxan hol bêro famkerdene û semedê girdkerdişê mucadeleyî veng da.
Grevê vêşanîye yê ke vera tecrîdkerdişê Rayberê Şarê Kurdî Abdullah Ocalanî yenî viraştene, dewam kenê. Veysel Gulero ke 35 rojî yo Zîndanê Tîpê Lyî yê Kalkandere yê Rîze de grevê vêşanîye de yo, maya ey Hayat Gulere derheqê xoverdayîşê ey de qisey kerd.
Hayat Gulere bale ante xoverdayîşê grevê vêşanîye ser û vat ke ganî înan ke bedenê xo dayê vêşanîye ver vengê înan hîna zaf bêro eşnawitene û va: “Lajê mi hema wexto ke mekteb de bi raştê zextê dewlete ame û 3 rey ame destbendkerdene. Tewr peynî de 18 serre ame tewqîfkerdene û 7 serrî yo zîndan de yo. Nê 7 serran de xeylî zîndanan rê surgun bi. Nika semedê azadîye benedê xo dayo vêşanîye ver.”
Gulere vist vîrî ke lajê aye bi 8 embazanê xo ya pîya semedê wedartişê tecrîdî grevê vêşanîye de yo û pest ba: ‘‘Lajê mi serra 2012 de zî Zîndanê Mîdyatî de semedê wedartişê tecrîdî 48 rojî grevê vêşanîye de mend. Bado zî bi vengdayîşê Birêz Ocalanî grevê xo qedînabi. Ewro rayberîya hemsereka KCDyî Leyla Guvene de 281 tepişteyî grevê vêşanîye de yê. Ma do ser bikewê , çunke ma biheq ê.”
Gulere vat ke qiseykerdişo tewr peyên de lajê aye nê vatî: “Daye meraq meke ma hol ê. Çalakîya ma biqerardarî dewam kena. Ma ra mevajêne çalakî cavêrdenê. Ganî her hes hol fam bikerê ke çalakîya hemraya ma Leyla Guvene yena çi mehne. Heta ke waştişê ma bêrî ca do çalakîya ma dewam bikero.”
Hayat Gulere peynîya qiseykerdişê xo de veng da mayanê Kurd û Tirkî û va: “Tecrîdê serê Ocalanî qet nîno qebûlkerdene. Kurdê ke semedê şikitişê tecrîdî bedenê xo dayê veşanîye ver ganî vengê înan hinda bêro eşnawitene. Ganî mayê Tirkî zî bikewê dewre. Tecrîd serê her kesî de yeno bicaardene. Semedê aşîtiye û ameyoxê no welatî ganî tecrîd bêro wedartene û rayîrê dîyalogî bêro akerdene.” AMED
