Zîndanê Tîpa Eyî yê Gîresunî de gardîyanan eştî koguşanê hepsîyan ser û dest ronayî kitab û radyoyê xoverdayoxanê grevê vêşanîye ser
Tarîx ra nata zext, zorî, teda, îşkence, hêriş û sewbîna her tewir binpaykerdişê heqan domenî. Hemverê pinpaykerdişan de heta nika xeylê xoverdayîş, çalakî û rojeyê mergî dîyayî dest pêkedene. Îdarekarê zîndanan zî seba nimitiş û pelçiqnayîşê xoverdayîşan hêrişê hepsîyan keno. Tewr peynî Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene seba wedarnayîşê tecrîdê serê Rayberê PKKyî Abdullah Ocalanî 197 rojî verê Zindanê Amedî de dest bi grevê vêşanîye kerde û dima ra 1ê Adare de bi hezaran hepsîyî kewtî grevê vêşanîye.
15 hepsîyê PKK û PAJKî 30ê Nîsane de çalakîya xo derbazê merheleyêka newe kerdî û rojeyê mergî dayî dest pêkerdene. Dima ra zî 10ê Gulane de grûba diyîn ke a zî 15 hepsîyan ra pê yena semedê şikitişê tecrîdê serê Rayberê PKKyî Abdullah Ocalanî dest bi rojeyê mergî kerde. Bi no hawa grevê vêşanîye derbazê merheleyêka newe bî û hêrişê vera hepsîyan zêdîyayî.
Ame zanayene ke Zîndanê Tîpa Eyî yê Gîresunî de vera xoverdayoxanê grevê vêşanîye de zext û binpaykerdişê heqan zêdîyayî û dewam kenî. Waştişê hepsîyan nînê caardene, gardîyanan saetê şewe de eştî koguşanê xoverdayoxan ser û dest ronayî kitab û radyoyê xoverdayoxanê grevê vêşanîye ser
Xoverdayox Mehmet Çagiriciyo ke 1ê Adare ra nata grevê vêşanîye de yo bi rayîrê telefonî keyeyê xo reyde pêvînayîş pê ard û qala rewşa ewja kerd. Çagiriciyî va: “Her roje zext xêdîyenî. Wextêko dergo ke vîtamîn nêdanî. Lazimîyê esasî û çîyê şimitişî nêdanî. Se beno wa bibo ma do heme şert û mercan de çalakîya xo bidomnî. Ma lazimîyanê xo yê esasî ke nêdîyenî ma, şekir, aw, çay û solî ra temîn kenî. Demê peyênan zextê tedawî b ima kenî. Saetanê şewe de erzenî koguşanê ma ser. Eke wina dewam bikero beno ke bi zorî ma tedawî bikerî. Amadekarîyê winasî kenî. Se beno wa bibo ma do têkoşînê xo bodomnî.” AMED
