Endamê YNKyî Reşad Gelalîyî derheqê ablûqaya artêşa Iraqî ya vera Kampa Multecîyan a Şehîd Rûstem Cûdîyî ya Mexmûrî de ANFyî rê qisey kerd.
Reşad Gelalîyî bale ante şirîkîya PDK û dewleta tirke ser û pare kerd ke PDKyî waştbi ke kampe bigêro binê kontrolê xo la pê ney nêeşkabi. Gelalîyî da zanayene ke PDK nika zî wazeno ke kampe xalî bikero û dima zî teslîmê Tirkîya bikero.
Gelalîyî îfade kerd ke kampe binê kontrolê Neteweyanê Yewbîyayeyan (NY) de ya û ganî komelo mîyanneteweyî vera na ablûqa têbigêro. Gelalîyî vat: ”Kampa Mexmûrî û qezaya Mexmûrî yewbînan temam kenê. Ê tim yew bîyê. Ez şarê Mexmûrî sey multecîyan nêvînena. Ê şarê herême ra yê. 25 serran ra zêdeyêr o Mexmûr de yê.”
Gelalîyî dîyar kerd ke ganî Mexmûr çarçewa huqûqê mîyanneteweyî de bêro pawitene.
Gelalîyî venga pêro kesan da ke wayîrê Mexmûrî vejîyê û peynîya alozîya herême bîyarê. Gelalîyî vat ke o hertim hetê şarê Mexmûrî de yo.
