Welatiyên Kobanê di dema derbasbûna dewriyeya hevbeş a hêzên rûs û tirk de kevir li konvoyê barandin. Artêşa tirk a dagirker jî bombeyên gazê li welatiyan barandin
Hêzên polîsan ên dewleta rûs û dewleta tirk a dagirker îro li gundê Aşmê yê li rojavayê kantona Kobanê dewriyeyên hevpar avêtin. Konvoya dewriyeyê li herêmên Çariqli ya Jorîn, Cibnê, Beyadî, Zormixar, Qeran, Dîmedaş, Sêlim Boban, Sifteka Jêrîn û nuqteya kontrolê ya Hêzên Ewlekariyê ya Navxweyî geriya. Dema ku konvoya dewriyeyê ji gundê Çariqliyê re derbas dibû, welatiyan kevir li seyareyên zirxî barand.
Di heman demê de li gundê Xorxor ê Kobanê jî leşkerên dewleta tirk bombeyên gazan avêtin gelê herêmê. Li ser vê yekê jî welatiyan seyareyên zirxî yên dewleta tirk dan ber keviran. Hat payîn ku piştî dewriyeya hêzên rûs û tirk bi ser gundê Aşmê re derbasî sînorê dewleta tirk bûn.
Welatiyek hatibû şehîdkirin
Hêjayî bibîrxistinê ye ku artêşa tirk a dagirker di 12’ê mijdarê de çalakvanên herêmê hedef girtin û di encamê de 4 sivîlên ji Kobanê birîndar bûbûn. Her wiha di 8’ê mijdarê de jî di dema dewriyeyê de panzêreke dewleta tirk li Girkê Legê da ser çalakvanan û di encamê de ciwanê bi navê Serxwebûn Elî şehîd bû. KOBANÊ
