Bi sedan welatiyên Ranya li dijî komkujiya Kortekê ya ji aliyê balafirên artêşa tirk pêk hat meşiyan û dewleta tirk şermezar kirin
Li bajaroka Çarqurne ya îdareya Raperîn a Ranyayê bi seden kes li dijî bombekirina balafirên şer ên artêşa tirk a li Kortekê meşiyan. Balafirên şer ên artêşa tirk di 27’ê hezîranê de li Kortek a Binarê Qendîlê êrîşê 2 wesayîtên sivîlan kir. Di encam de ji heman malbatê 3 kes şehîd bûn û 5 kes jî birîndar bûn. Li bajaroka Çarqurne ya îdareya Raperîn sersaxî tên qebûl kirin. Îro bi seden kes çûn sersaxiyê û piştî sersaxiyê girse li dijî komkujiyê meşiya.
Xizmên kesên di komkujiyê de şehîd bûbûn jî beşdarî meşê bûn. Meşê li ber avahiya qaymeqamtiyê destpê kir. Di meşê de posterê wêneyên kesên li Kortekê şehît bûne û nivîsa “Nemirî û serbilindî ji bo şehîdan û şermezarî ji bo dewleta tirk û nokaran” hildan û dirûşmeya “Şehîd namirin’ berz kirin. Meş heta Mizgefta Îmam Xizalî berdewam kir. Li ser navê malbatê axaftin hate kirin. Piştre Hevseroka Tevgera Azadî ya Civaka Kurdistanê (Tevgera Azadî) Şîlan Şakir axivî û êrîşên artêşa tirk bi tundî şermezar kir. RANYA
