Li gel qedexeya Walîtiya Stenbolê û qedexeya derketina derve jî karker û kedar ji çar milan ve meşiyan Taksîmê û xwestin 1’ê Gulanê pîroz bikin. Polîsan, bi awayekî tund mudaxaleyî bi sedan kesên ku bi pankart û dirûşmeyan bertek û daxwazin xwe qêriyan, kirin û ew binçav kirin. Qadên bajar ku bi hinceta pandemiyê hatine qedexekirin bi dûrişma ‘Bijî 1’ê Gulanê’ têje bûn.
Polîsan mudaxaleyî meşên 1’ê Gulanê ku ji nokteyên cuda yên Beygolû, Osmanbey û Mecîdekoy dest pê kirin, kirin û bi dehan çalakgeran binçav kirin. Meclisên Ciwanan û Platforma Piştevaniya Sosyalîst, ji bo biçin Taksîmê li Mecîdekoyê li hev civiyan û bi pankarta ‘Em hatin tiştên we ji me diziye ji we bigirin’ û ‘Em ê faşîzmê têk bibin’ dest bi meşê kirin. Piştî berzkirina ‘Bijî Yekê Gulanê’ polîsan mudaxaleyî girseyê kir û destê 19 kesan ji pişt ve kelemçe kir û binçav kirin.
Bi ser barîqata polîsan de çûn
Komîteyên Ciwanan jî bi pankarta ‘Li her derî têkoşîn, ji kesên nikarin bibin desthilat re’ meşiyan Taksîmê. Komîte, bi dûrişma ‘Bijî têkoşîna me ya 1’ê Gulanê’ bi ser barikata polîsan a li Qada Galatasarayê de çûn. Polîsan, li vir bi awayekî tund mudaxaleyî Komîteyên Ciwanan kirin. Polîsan gelek xwendekarên zanîngehê binçav kirin.
Endamên Lîmter-Îş, Înşaat-Îş, Dev Yapi-Îş, Dev Turîzm-Îş, Komeleya Karkerên Ciwan, BÎK’ê jî bi dûrişma ‘Her der Taksîm, her der berxwedan’ xwestin bimeşin Taksîmê. Polîsan mudaxaleyî vê girseyê jî kir. Polîsan li Hevserokê ESP’ê Şahîn Tumuklu dan û ew binçav kirin.
Şoreş dikare vê kirêtiyê paqij bike
Xwendekarên Yekitiya Têkoşînê jî bi pankarta ‘Israra di Taksîmê de israra di şoreşê de ye’ xwest ji Kolana Siraselvîler bimeşe Taksîmê. Polîsan, mudaxaleyî çalakgeran kir û ew binçav kirin. Polîsan, 4 xwendekarên Kovara Kaldiraçê ku bi pankarta ‘Şoreş dikare vê kirêtiyê paqij bike’ xwestin bimeşin Taksîmê jî binçav kirin.
Bijî Yekê Gulanê
Lijneya Yekgirtî ya Karkeran jî xwest ji Mecîdekoyê bimeşe Qada Taksîmê. Polîsan, mudaxaleyî girseya ku bi dûrişma ‘Bijî Yekê Gulanê’ meşiyan, kir û gelek kesî binçav kir. Polîsan 10 endamên Xebata Anarjîst a Şoreşger jî dema ku xwestin ji Mecîdekoyê bimeşin Taksîmê jî binçav kirin.
Bi erdê ve kaş kirin
Ji Platforma Çîna Şoreşger a Serbxiwe 4 jin jî xwestin bi dûrişma ji kolana Ortaklari ya Mecîdekoyê bimeşin Taksîmê. Polîsan wan jî binçav kir. Her çar jinan pankarta ‘Bijî 1’ê Gulanê bijî Sosyalîzm’ vekirin û bi dûrişma ‘Di 1’ê Gulanê de em li qada 1’ê Gulanê ne’ meşiyan. Polîsan xwe li meşa wan negirt û êrîş bir ser wan. Polîsan her çar jinan bi erdê ve kaş kir.
7 endamên Partîzanê û Ciwanên Demokratên Nû (YDG) xwestin ji kolana Ortaklarê ya Mecîdekoyê bimeşin Taksîmê. Polîsan li her 7 kesên ku bi dûrişma ‘Wê serkeftin a karkerên berxwedêr be’ û “Bijî Yekê Gulanê’ hatin qada Mecîdiyekoyê, dan û binçav kirin.
Li Enqereyê 4 kes hatin binçavkirin
Her wiha Federasyona Anarşîzmê ya Şoreşger (DAF), xwest 1’ê Gulanê li Kizilay a Enqereyê bi meşekê pîroz bike. Polîsan bi hinceta bergiriyên vîrûsa koronayê, mudaxaleyî koma ku bi berzkirina dirûşmên ‘Bijî 1’ê Gulanê’ dest bi meşê kir, kirin. Polîsan bi lêdanê 4 kes binçavkirin û bi hinceta danezana ku Miduriyeta Giştî ya Polîsan di rojên berê de weşandibû, kesên xwestin dîmenan bikişînin asteng kirin. STENBOL – ENQERE
