Gelîyê Zîlane ya qezaya Erdîşî ya Wanî de 3ê temmuza 1930î de 44 dewî ameybî veşênayene û bi hezaran kesî zî ameybî qertilkerdene. Tarîxê fermî de ca nêdîyeno no hedîse. No qetlîyam rojnameyanê aye wextî de sey ‘Pakîye dîya destpêkerdene, kesê Çemê Zeydanî bi temamî ameyî îmhakerdene’ yeno binamekerdene.
Gelîyê Zîlane ya qezaya Erdîşî ya Wanî de serra 2014î de ame waştene ke projeyê Santralê Hîdroelektrîkî (HES) bêro viraştene. Badê reaksîyonê dewijan û dorme proje ameybî redkerdene. La ame zanayene ke projeyo ke aye wext ame redkerdene reyna dîya destpêkerdene. Derheqê babete de Hemsereka Partîya Demokratîke ya Şaran (HDP) ya Erdîşî Sarya Bîlîcîye qisey kerde û dîyar kerde ke ê do destûr nêdî viraştişê projeyî
‘No raşte çimeyê debara dewijan o’
Hemsereka HDPyî ya Erdîşî Sarya Bîlîcîye daye zanayene ke Vîrusê Korona ra herkes keyeyê xo de yo û na rewşe sey firsend ame vînayene. Bîlîcîye qiseykerdişê xo de dîyar kerde ke coka dest bi xebatê HESî kerdî û wina dewam kerde: “Na herême çimeyê debara dewijan a. Na herême çimeyê heywankarîye û berardişî ya. Eketîya de HES bêro viraştene do xozaya tîya texrîb biba û do dewijî nêeşkî debara xo bikerî.”
‘Çemê Zîlane de esteyê kal û pîrikanê ma estî’
Bîlîcîye tewr peynî bale nate serranê 2014-2015î ser o û wina va: “Aye hewl dîya ke HES bêro viraştene. La netîceyê çalakî û îtîrazan de projeyê HESî ame betalkerdene. Ma sey partî serê na babete de vindenî. Hewl danî ke vîrus sey firsend bixebetnî. La ma do destûr nêdî. Ma destûr nêdanî çinkerdişê xoza û tarîxî. Çemê Zîlane de esteyê kal û pîrikanê ma estî.” WAN
