Gulîstan Dokuye 5ê çeleyî ra nata vînbîyaye ya. Netîceya xebetanê cigêrayîşî Gulîstane ra rêçêk nêame dîyene û tehqîqatê serdozgerîye zî aver nêşino. Wendekarê Unîversîteya Munzurî, dezgehê komelkî yê sivîlî hema zî persenê ke ‘Gulîstan Dokuye kotî de ya?’ Dêrsimijî îfade kenê ke seba ke babîyê gumandarê yewînî Zainal Abarakovî polîs o serebût sey ‘xokiştişî’ yeno mojnayene. Hemwelatîyî eşkera kenê ke naye ra têna awbend de xebeta cigêrayîşî ameye kerdene û ê fikirîyenê ke Gulîstan Dokuye ameye kiştene.
Îsa Buranî ard ziwan ke ekîpanê cigêrayîşî raporanê xo de da zanayene ke Gulîstane awbend de nîya la serdozgerîye bi israr îdîa kena ke Gulîstane awbend de ya û va: “Zainal hema zî bi hawayêkê bidetayî nêame perskerdene. Eke Gulîstane awe de bibîyêne heta nika ma a dîyêne. Ma hînî îhtîmalê cînayetî fikirîyenê.”
‘Beno ke a kişîyaye zî’
Gulbahare Tekçe zî qiseykerdişê xo de veng daye şarê Dêrsimî ke wa na babete de hîsger bibo û wina va: “Senî Gulîstane hema zî vînbîyaye ya? Ma na rewşe ra şik kenê. Beno ke a kişîyaye zî.”
‘Ma her roje persenê ke Gulîstane kotî de ya’
Hemwelatîyo bi nameyê Ahmet Erolî zî va ‘Wina ame mojnayene ke Gulîstane xo kişta’ û wina dewam kerd: “La ez naye ra bawer nêkena. Ma her roje persenê ke Gulîstane kotî de ya. Vanê ‘ma gêrenê ci.’ La têna ewnîyenê awbendî. Eke raşt a zî bigêrayêne ci nika rewî ra eşkera bibîyêne ke Gulîstane kotî de ya. Eke Gulîstane xo bikiştêne zî vejîyayêne werte.”
‘Cinîyî binê teda de yê’
Tewr peynî Ezgî Karaman qisey kerde û dîyar kerde ke raştîya serebûtî yena mîyankerdene û va: “Dêrsim de rojanê peyênan de polîtîkayê cîyayî yenê kerdene. Cinîyî binê teda de yê. Ma sey cinîyan eşkenê na rewşe bivurnê. Ganî ma serebûtê Gulîstane zî, ê îstîsmar û tacîzan zî çareser bikerê.” DÊRSIM
