Gerîla Zîlan Avrîna ke tunelanê şerî yê Şehîd Berxwedanî de 47 rojan pa embazanê xo xoverdayîşêko tarîxî kerd, ANFyî rê qala wehşetê dewleta tirke yê vera leşkeranê xo û ruhê fedayî yê gerîlayan kerde.
Gerîla Zîlan Avrîne vat:
”Nameyê mi Zîlan Avrîn a, ez Efrînî ra ya. 2017 de hêrişê vera Efrînî zaf tesîrê mi kerd. Cerganê dewleta tirke rojêke da dadîya mi ro. No zorê mi şi û ez tewra gerîlayan bîya. Ez derbazê Zapî bîya. Warê Xoverdayîşî yê Şehîd Şahînî de ma vera dişmenî amadekarîya xo kerdbi. Îmkanê ma tay bîyî, awa ma zî çin bîye la ma amadekarîya xo kerdbî. Ma armanc kerdêne ke dişmen Şehîd Şahîn de bin bivisnê.
Dişmenî nîsane de hêrişê Zapî kerd. Dişmenî Şehîd Şahînî de key waşt ke leşkeranê xo bîyaro war gerîlayan ra derbî werdî. Dişmenî hêrişê xo yê peyênî ra hêverî war da bombayan ver. Dima kewt Şehîd Şahîn û pê çekanê kîmyewîyan dest pê hêrişî kerd. Ma sey çar embazan kewtî mewzîyan û vera dişmenî çalakîyê xurtî kerdî. Leşkeranê tirkan pêr teknîk û çekê xo yê kîmyewîyî şuxilnayêne la reyna zî nêeşkayêne îradeyê gerîlayan bişiknê. Destê ma de têna kalaşnîkof est bi. Rixmê ney zî dişmen nêeşkayêne xo nêzdîyê tunelan bikero.
Dişmen seba ke nêeşkayêne singe bi singe şer bikero bombardumanî kerdêne. Bombardumanê peyênî zerar dabi tunelî. Ez û embaz Bager ma firîyayî cayêkî. Tozê bombardumanî tesîrê ma kerd. Mi embaz Bager dî. O sereyê xo ra birîndar bibi û nêeşkayêne wirzo payan ser. Ma xo erdî ra kaş kerd û resayî cayê embazan. Embaz Bager o çax xo ra bi. Malzemeyê ma yê dermanî zaf çin bi. Seba ke ez bilîya embaz Bagerî bîya mi dejê xo, xo vîr a kerd. Ma bi giranî birîndar bîyî. Embaz Bagerî pê ey halê xo vatêne ‘Îmkanê ma kêm bê zî ma do meverdê dişmen erdê ma îşxal bikero. Hêzê înan teknîk o, ê ma bawerîya bi Rayber Apoyî ya.’
Dişmen seba ke bikewo tunelan bi giranî çekê kîmyewîyî şuxilnayêne. Înan gazê îsotî zî şuxilna. Ma verî binê tesîrê gazî de mendî la dima vera dişmenî şer kerd. Dima dişmenî gazo ke tira boya lastîka vêşaye ameyêne şuxilna. Dima dişmenî gazêko bêboye la şirîn şuxilna. Nê kîmyewî zaf tesîrê ma kerd ma xo ra şîyêne. Ma cade tedbîrê xo girewt. Dişmenî a hele gazêko çeqer şuxilna. Nê gazî beden de birînî viraştêne, zereyî qelibnayêne, sere dejnayêne û nebz berz kerdêne. Ma nêeşkayêne tesîrê ci ra destê xo berz bikerê. Rixmo ke ma ser de kincî bîyê paştî, pîze û engiştanê ma de birînî bîyî.
Rojêke de 24 reyî hêrişê kîmyewî
Ez, embaze Avzeme û embaz Şervan bi taybetî ma binê tesîrê kîmyewî de mendî. Seba ke dişmenî hîrê rojan pêser çekê kîmyewîyî şuxilnayî ma berê mangaya xo zî anêkerd. Coka ma nêeşkayêne oksîjen zî bigêrê. Na rewşe yew hewte wina dewam kerd.
Dişmenî reyna xîret kerd ke debikewo tunelan. Ma zanayêne de leşkerî zaf tersayêne. Înan mabênê xo de qisey kerdêne, vengê înan ameyêne ma. Seba ke nêeşkayêne bikewê zereyî vatêne ‘teslîm bibê.’ La înan îradeyê Apogîran zanayêne. Seba ke nêeşkayê debikewê zereyê tunelî pê bomba tunel qefilna. A roje înan 24 reyî çekê kîmyewî şuxilnayî. Kîmyewîyê çeqerî ra pirnik û fekê ma ra awa çeqere ameyêne.
Dişmenî cenazayê leşkeranê xo vêşnayî
Ma bi maske û tupê oksîjenî vera dişmenî çalakîye kerde. Embaz Bager pê hesîya ke boyêka meyîtî ha yena. Ma pê çimanê xo dî ke dişmenî tay cenazayê leşkeranê xo eştbî pêser û vêşnayêne. Dima ma agêrayî cayê xo. Boya cenazayan û çekanê kîmyewîyan ra ma nêeşkayêne nan biwerê. Embaze Avzeme û embaz Bagerî bi israrî seba enerjî çîyê şirînî dayêne ma. Kampa ma de mareyê qijî est bîyî. Çekanê kîmyewîyan ra mareyî masayêne. Tesîrê înan ra tehmê awe zî tirş bibi. Coka madeyê kîmyewî çita rê tesîr kerd ma o çi nêşuxilnayêne.
Seba ke dişmenî bin bivisnê ma her çî girewt verê çimî
Şehîd Şahîn de awe çin bîye ke ma pê dest û rîyê xo bişiwê. Ma hîrê mengan heman kincî dayî xo rê. Tozê kîmyewîyan ma ser de bîyî. Wexto ke ma destê xo berdêne kincê xo û berdêne fekê xo ma tehmê zaf tirşî girewtêne. Çekanê kîmyewîyan ra gijikê ma rişîyayêne. Rojêke ma îmkan dî kincê xo şitî. Mi nobete girewt, embaze Bêrîvane zî kincî şitêne. Rîyê ma de maske bîyî la reyna zî embaze Bêrîvane pê boya kîmyewîye nêeşkaye. Coka a şîye embaz Arjîn ame.
Kincê ma ziwa nêbîyêne coka madeyê kîmyewî zeliqîyayêne ci û uca ra zî temasê bedenê ma kerdêne. Ma hewte de reyêke kincê xo bedilnayêne la tay embazan de kincê bînî çin bîyî. Wexto ke dişmenî hêrişê hewayî yan zî kîmyewî kerdêne gijikê ma kewtêne pê û rişîyayêne. Îmkanê ma zî çin bi. Coka ma gijikê xo qesna.
Seba ke dişmenî bin bivisnê ma her çî girewt verê çimî. Ez key qala embazan bikera nêeşkena. Ez zaf binê tesîrê tewirê Embaze Avzeme û Bagerî de menda. Embaz Bagerî vatêne ‘Ez wazena biba sey Vîyane, biresa asta înan.’ Embaz Bagerî xeta fedayî ya Rayber Apoyî de têkoşîn kerdêne. Nê 47 rojan embazan têkoşînêko pîl kerd. Têkilîya înan zaf qîmetîn bîye. Rojêke ma pancera ra dî ke di leşkerê tirkî hê lej kenê û yewbînan rê heqaret kerdêne. Wexto ke cenazayê dişmenî kewtêne ma destî ma vatêne ‘bêrê, cenazaya xo bigêrê’ la dişmen wayîrê cenazayanê xo nêvejîyayêne.
Bira çalakîya fedayîye
Embazîya Bager, Şerzan û Milîtanî cîya bîye. Embaz Bagerî ê rojan qetî zerrîya çewî nêşikite. Embazan bi bawerî û qerardarî şer kerdêne û vatêne ke ‘Se beno wa bibo ma do ser bikewê.’ Her kesî moral dayêne yewbînan. Dişmenî hêrişê kîmyewîyî zêdînabî. Nê hêrişan de erzaqê ma tay îmha bi, seba ke înan jehr eştbi awe ma nêeşkayêne bişimê.
Hîrê leşkerê bi nameyê Aslan, Bora û Melîh kewtî tunelî. Wirdî merdî, Melîh birîndar bi û dima o zî merd. Dişmenî naye ra dima hêrişê xo kerdî giranêr. Înan waşt ke cenazayanê xo bigêrê, ma zî dayî la înan cenazayî vêşnayî.
Wexto ke dişmenî pê teqayîşî cenazayê xo vêşnayî pêro çî-mîyê ma zî îmha bi. Ma pîya roniştî û tunelî ra vejîyayîş ser o embazan de qisey kerd. Embaz Bagerî bi hawayêkê netî vat: ‘Se beno wa bibo ez do Şehîd Şahînî ra nêvejîya.’ Ma zî vat ke ma do tunelî meteriknê, têna şikefte ra vejîyê. La seba ke embaz Bagerî nêwaşt embaze Avzeme û Arîn zî nêwaşt ke tunelî ra vejîyê. Çar embazan bire daye uca de bimanê. Ma zanayêne ke ê do çalakîyêka fedayîye bikerê. Ma înan ra xatir waşt la zaf zehmet bi. Ma şikefte ra vejîyayî, mabênê ma û dişmenî de 25 metre est bîyî. Yew di saetan ra pey vengê teqayîşî ame. Ma vat qey ke embazan çalakîya fedayîye kerdêne. Wexto ke ma vengê teqayîşî eşnawit seke bedenê ma lete bi. Ma zanenê ke rojêke do qesasê nê embazanê ma bêro girewtene.
Partîye de bi hezaran Avzemî û Bagerî est ê
Rayîrê ma derb bi. Seba ke şarê ma raştîyan bizano ma ganî belgeyî bi weşî biresnayêne. Ma vêşan û têşan bîyî. Embazan pelê engûran werdêne. Milê ma de mesuldarîyêka pîle est bîye. Rayîr de zî têgêrayîşê hewayî yê dişmenî bi giranî qewimîyayêne. Dişmen pê teknîkê xo bawer bi la nêeşka verê ma bigêro. Destê ma de vîdeo û fotografê leşkeran zî est bîyî.
Wa şarê ma na raştîye bivîno. Embaze Avzeme û embaz Bager ewladê pêro Kurdîstanî yê. Ganî her kes wayîrê şehîdan vejîyo, Rayber Apoyî azad bikero. Wa şarê ma dişmenî hol bişinaso û bizano ke gerîlayî senî hê têkoşîn kenê. Mîyanê partîya ma de bi hezaran Avzemî û Bagerî est ê. Şarê ma wa vera nê hêrişan bêveng nêmano.
Dişmenî operasyonê xo yê îşxalî rê vato ‘Pençe-Kilîd.’ La Zap de bi xo bîyo kilîdkerde. Avaşîn, Metîna û Vakur de zî bin kewt. Dişmen do nêeşko bi rehetî erdê ma îşxal bikero. Ma do vera dişmenî xeta embaz Bager, embaze Avzeme de têkoşîn bikerê û qesasê înan qetî bigêrê.” BEHDÎNAN
