Gerîlayê HPG û YJA-Starî Cengê Heftanînî de vera artêşa tirke ya îşxalkere xo ver danê. Xoverdayîşo tarîxî pê çêrîyêka bêhempa dewam kena. Artêşa tirke seba ke erdê Başûrî de serwer biba, sînoran û qirkerdişan nas nêkena. Her roje xoza û gandaranê Kurdîstanî zî kişena. Hêriş û bombardumanan de her roje şewat vejena.
Gerîlayan warê şerî de pezkovîyêke dîye ke pezkovî yew menge ya û dadîya ci zî bombardumanê artêşa tirke de ameye kiştene.
Pezkovîya ke binê bombardumanî de mendbî paşt û goşanê xo ra zî birîndar bîye. Gerîlayan pezkovîye warê şerî ra vete û birînê ci derman kerdî. Pezkovî nika şerwananê azadîye reyde manena û ciwîyena. Gerîlayanê azadîye nameyê ci zî Soryaz na pa. BEHDÎNAN
