Li rojhilatê Kurdistanê gerîlayên YRK û HPJ’ê bi merasîmekê Newroza 2019’an pîroz kirin
Li rojhilatê Kurdistanê gerîlayên YRK û HPJ’ê bi merasîmekê Newroz pîroz kirin. Pîrozbahiya ku endamên fermandariya YRK û HPJ’ê jî tevlî bûn, bi merasîma leşkerî û rêzgirtinê dest pê kir.
Di merasîmê de ji fermandarên YRK’ê Şiyar Şevger axivî û Newroz li Rêberê Gelê Kurd Abdullah Ocalan, berxwedêrên grêvên birçîbûnê, tevahî gelê kurd û mirovahiyê pîroz kir. Şevger diyar kir ku dê bi ruhê Newroza 2019’an têkoşîna xwe bilintir bikin û êrîşên dagirkeran têk bibin. Şevger destnîşan kir ku ew wekî tevgera azadiyê di merheleyek girîng de derbas dibin û wiha dom kir: “Ev merheleya berxwedayînê ye. Vê berxwedaniyê li tevahî cihanê de deng vedaye. Bi bihara 2019’an re di nava gerîla de kelejanek mezin çêbûye. Gerîla ji her demê zêdetir ji bo azadî û serkeftinê amade ye. Wek hêzên rojhilatê Kurdistanê em ê jî di vê merheleyê de erka ku dikeve ser milê xwe heta dawiyê pêk bînin û dijminê xwînxwar têk bibin.”
Şevger balkişand ser êrîşên dewleta tirk û wiha axivî: “Dewleta dagirker dixwaze bi her awayî li ser destkeftiyên me êrîşan pêk bîne. Çawa Kawayê Hesinkar li hember zilmê serî rakir û agirê Newrozê geş kir, her wiha di şexsê Mazlûman de ev bilind bû, îro jî di şexsê Leyla Guven û Zulkuf Gezenan de gihiştiye lûtkeyê. Gerîla tu carî nahêle agirê Newrozê vemire.”
Şiyar Şevger axaftina xwe bi van gotinan bidawî kir: “Gelê me yê Rojhilat gelekî berxwedê re. Tu carî li hemberî zilm û zordariyê serî netewandiye. Bi rihê Newrozan dê careke din li dijî zordariyê serî rake. Ewê careke din bi sedan Kawa, Mazlum, Leyla û Zulkufan biafirînin. Li ser vî esasê em soz didin ku wek hêzên Rojhilatê Kurdistanê her tim li dijî dagirkeriyê şer bikin û nehêlin agirê Newrozê vemire.” Piştî merasîma leşkerî gerîlayan bi muzîk, dîlan û skêcan pîrozbahîya Newrozê domand. SILÊMANÎ
Çavkanî: Rojnews
