Pêngava Cenga Heftanînê li ser şert û mercên giran ên zivistanê bi biryardariyeke mezin dewam dike. Gerîlayên ku li herêma Heftanînê li dijî dagirkeriya tirk şer dikin, ji ajansa ANF’ê re axivîn.
Gerîlaya YJA Starê Arîn Hîlvan diyar kir ku ew bi biryar in, nehêlin dagirker li xaka Kurdistanê, li çiyayên Kurdistanê bimînin û wiha got: “Ev ax, ev çiya yên me ne, ax namûsa me ye. Wezîfeya me ya ku em welatê xwe ji dagirkeran biparêzin. Em hêza xwe ya herî mezin jî ji Rêbertî û şehîdan werdigirin.”
Hîlvan anî ziman ku ew xwe ji tu fedakariyê venagirin û destnîşan kir ku bi Pêngava Cenga Heftanînê re wê êrîşa dagirkeriyê ya artêşa tirk beralî bikin ku navê ‘Pençe 3’ lê kirine.
Her wiha Hîlvan ragihand ku ew bi ruhê Viyan, Çîçek û Amarayan bi ser artêşa tirk ve diçin û wê vê yekê bidomînin û got ku gerîla wê bibe tirsa dilê dijminê faşîst.
Ne kurd ne jî gerîla diqede
Ji gerîlayên YJA Starê Rûken Ezdan diyar kir ku dewleta tirk bi hemû hêza xwe ya şer êrîş dike û xwe dixapîne ku wê gerîla biqedîne û wiha got: “A rast dawiya xwe amade dikin. Çi dikin bila bikin gelê kurd jî gerîla jî naqedin. Ji her demê bêhtir em bi biryar in. Ji bo bersivê bidin pêvajoyê em ê xwe ji tiştekî venegirin.” BEHDÎNAN
