Girewteyê endamê PKK û PAJKî va:“ Beno ke ma zindanan de esîr ê, la wa bêro zanayene ke ma qetîya peyser game nêerzenê.“ Girewteyî veng danê ke wa qet kes bêveng memano û her kes paştdarîye bido xoverdayîşê grevê vêşanîye.
Denîz Kayayî, bi nameyê endamanê PKK û PAJKî yê girewteyan, derheqê komploya mîyanneteweyîye û grevanê vêşanîye de beyanat da.
“Ma kewtî serrgêra 21. ya komploya serê Rayberîye û wextêko winasî de ma vînenê ke sîstemê olîgarşîk-despotî bi hesabanê menfaatperestî yê polîtîkayan û bi metodanê faşîzanîye her çiqas zor bido zî komploye nearda serê û no derheq de netîce nêgirewta. Dewletê hegemonî ameyî têhet û vera Rayberîya ma komploye naye ro û na komplo eslê xo de vera pêroyê şaranê Rojakewteya mîyanêne, şarê Tirkî û şarê Kurdî ameye ronayene. Eke komploya 15ê Sibate ke bibîyêne serkewte, o wext faşîzm bîyêne meşrû û bi no qeyde pêro nasname û şarî bi qeltkerdiş û qirkerdişî ameyêne çinekerdene. No xetere hîna zî dewam keno.
Bitaybetî zî hedefê îtîfaqê faşîstî yê AKP-MHPyî o yo ke komploye ra netîce bigîrê. No sebeb ra yo, seba ke komploye newe ra bikerê aktuel, desteberê ra çi yeno kenê. Sîstemê Îmraliyî, xelatê pereyan ê serê fermandaranê PKK’yî û bombardûmankerdişê ko û bajaran, talankerdişê bajaranê Kurdîstanî, tepiştişê sîyasetmedar û welatperweranê Kurdistanî, bi nê pêroyînan kenê ke komploye bikerê aktuel û ci ra netîce bigîrê. Ewro Rayber Apoyî bi vindetiş û xoverdayîşê xo yê miqeremî komplo îfşa kerda. Ma komploya mîyanneteweyîye ya vera Rayber Apoyî şermezar kenê.
Ma Halît Oral û hevalanê xo yê şehîdan ê çalakîya ‘Şima nêeşkenê roja ma tarî bikerê’ bi minet û hurmet yad kenê. Ma endamê PKK û PAJKî yê girewteyî vanê, ma ciwîyayîşê bê Rayberîye qetîya qebûl nêkenê û seba naye çi bedel hewce keno, ma do bidê. Seba ke tecrîdê serê Rayberîya ma bêro wedaritene, seba ke şert û mercê xebat û ciwîayîşî yê azadî ganî bêrê awankerdene, seba ke Rayberîya ma avûkat û keyeyê xo de pevînayîşan bikero ma dest bi grevê vêşanîye kerd û xoverdayîşê ma do hîna biqerar û cîdîyet dewam bikero
Leyla Guvene 7ê Teşrîna Peyêne de dest bi grevê vêşanîye kerd û ewro xeylî hepisxane û merkezan de no xoverdayîş dewam keno. Xoverdayîş her roja newe ye de hîna beno pêt û hîra. Ma do bi nê xoverdayîşê xo bibê serkewte, no derheq de bawerîya ma tam a. Ma hepisxaneyanê Tirkîya de 301 hevalî grevê vêşanîye bi qerarîye domnenê. Hevalê ma yê ke Ewropa, Başûr û merkezanê bînan de, xoverdayîşê grevê vêşanîye domnenê rê selam vanê. Xoverdayîşê ma bi her hewa dewam bikero. Heta ke tecrîd nêro wedaritene, ma do xoverdayîşê xo bidomnê.
Faşîzm ra bi xoverdayîş yeno xelisnayene
Polîtîkayê îtîfaqê faşîstî yê AKP-MHP’yî ewro hetê têgerayîşê ma û hetê şarê ma ra ameyî deşîfrekerdene û xêrca xoverdayîşî yew alternatîfê ma çin o. Ma bi şîarê Mazlum Doganî ‘teslîmîyet îxanet, pasîfîzm binkewtiş, xoverdayîş serkewtiş o’ xoverdanê û zanê ke na xêze ma kena serkewte. Çunke her ca û her wext de, mucadeleyê vera faşîzmî meşru yo. Warê sîyasetê demokratîkî de xoverdayîş, weçînitişanê herêmkîyan de xoverdayîş xoverdayîşê meşru yê. No sebeb ra ma venga pêro heskerdoxanê demokrasîyî, nuştox, roşnviran danê ke wa vera faşîzmî mucadeleyî bikerê berz.
