Hêzên artêşa tirk a dagirker û çeteyên wê ji bo dagirkirina navçeya Eyn Îsayê ku xwedî cihekî stratejîk e, hewl didin navçeyê dorpêç bikin. Li hemberî van hewldanan jî şervanên HSD’ê, hêzên ewlekariyê û hêzên rejîmê li ber xwe didin
Navçeya Eyn Îsa ya Girê Spî di hêla erdnîgariyê de xwedî girîngiyeke stratejîk e. Navçe di navbera herêmên Cizîr û Firatê de ye. Di heman demê de di navbera bajarên Reqa, Tebqa û Dêrazorê de ye û rêya navneteweyî û korîdora di navbera Hesekê-Helebê li vê navçeyê re derbas dibe. Ji ber vê yekê ye ku dewleta tirk a dagirker û çeteyên wê hewl didin dagir bikin. Bi vê yekê re jî hewl didin rêya navdewletî qut bikin.
Gelemperiya şêniyên navçeyê kurd û erebin. Navçe 45 km’yan ji sînorê bakurê Kurdistanê dûr e. Piştî ku gundê Şergirak û depoyên wê ku 15 km li bakurê hatin dagirkirin, dewleta tirk hem li hêla bakur û hem jî ji hêla rojavayê navçeyê ve dest bi êrîşên xwe kir.
Dixwazin navçeyê dorpêç bikin
Di vê çarçoveyê de çeteyên dewleta tirk li gundên Metamîh, Tîne, Zêbe û El Defî yên li bakurê rojavayê navçeya Eyn Îsayê bi cih dibin. Ji bo ku navçeyê ji hêla başûr ve dorpêç bikin jî di 23’yê mijdarê de êrîşî gundên Seyda û Mielek ên li bakurê kampa Eyn Îsayê kirin. Bi vî awayî hewl didin navçeyê hem ji hêla bakur û hem jî hêla rojava ve bixin dorpêçê.
Êrîşên destpêkê hatin şikandin
Li hemberî van êrîşan, şervanên Hêzên Sûriyeya Demokratîk (HSD), Hêzên Ewlekariya Hundirîn û hêzên rêjîma Sûriyeyê jî bersivên tund didin. Şervanan heta niha erîşên çeteyan têk birin. Çete niha bi qasî 6 km’yan nêzî navçeyê ne.
Hêzên artêşa tirk a dagirker û çeteyên wê hêzên leşkerî li derdora gundên Xalidiyê û Dibis ên li rojavayê navçeyê bi cih kirin. Balafirên keşfê jî bê navber li asîmanê herêmê digerin. EYN ÎSA
