Dostên kurdan di 10’ê cotmehê de bi armanca azadiya fizîkî ya Rêberê Gelan Abdullah Ocalan li Îmraliyê di şert û mercên tecrîda girankirî de tê girtin û 34 meh in tu agahgî jê nayê girtin, li 74 navendên cihanê pêngava “Ji Abdullah Ocalan re azadî, ji pirsgirêka kurd re çareseriya siyasî” dan destpêkirin. Ji bo piştgiriya bi pêngavê re jî li girtîgehên Tirkiye û Kurdistanê girtiyan dest bi greva birçîbûnê kirin. Greva birçîbûnê ya girtiyan di roja 32’yan de berdewam dike.
Endamê Komîsyona Girtîgehan a Şaxa Komeleya Hiqûqnasên ji bo Azadiyê (OHD) ya Stenbolê Rezan Gezer derbarê rewşa girtiyên di girtîgehên herêma Marmarayê de greva birçîbûnê didomînin agahî da. Gezer diyar kir ku wekî OHD’ê du hefteyan carekê serdana girtîgehên herêma Marmarayê dikin û wiha got: “Gotin û fikra hevpar a girtiyên di greva birçîbûnê de, bidawîbûna tecrîda li ser birêz Abdullah Ocalan û girtiyên din e.”
Gezer der barê binpêkirinên mafan de yên girtî bi wan re rû bi rû dimînin, jî hin agahî parve kirin. Gezer, bal kişand ser wê yekê ku li Girtîgeha Sîlîvriyê bi taybetî girtiyên di greva birçîbûnê ya Hejmara 3’yan de bi tecrîda li ser tecrîdê re rû bi rû ne û wiha domand: “3 girtiyên di greva birçîbûnê de biribûn hucreyên cuda. Li hin cihan lêpirsînên disiplînê hatin destpêkirin û li hin cihan jî girtî ji hin çalakiyên civakî bêpar hatine hiştin. Bi taybetî li Girtîgeha Marmarayê mafê hewadariyê yê 4 saetan daxistine saetekê. Em wiha difikirin ku dê bi vî awayî hêdî hêdî pêleke lêpirsînê jî dest pê bike. Rêveberiya girtîgehê ewilî fikirî ku dê ev yek bêbandor be yan jî dê nedome, lê dema gav bi gav vîna kesên li wir dît, helwesta xwe ya li hemberî girtiyan jî hişk kir.”
Di berdewamiya axaftina xwe de Gezer bal kişand ser helwesta Lijneya Îdare û Çavdêriyê ya li hemberî girtiyên di greva birçîbûnê de û got: “Lijne bi gotina ‘We ji rêxistinê talîmat girtiye û ji ber talîmatan hûn vê grevê dimeşînin’ dest bi lêpirsîna disiplînê dike. Dibêje, ‘Ji ber ku hûn karê girtîgehê û aramiya girtiyên din xera dikin em cezayê disiplînê li we dibirin.’ Kesên ku 30 sal cezayê muebetê yan jî cezayê muebetê giran li wan hatiye birîn, 3 caran mafê wan ê disiplînê heye. Dema sê caran ceza li wan bê birîn, nikarin sûdê ji berdana bi şertî bigirin an jî înfaza wan tim tê taloqkirin.”
Gezer diyar kir ku beriya destpêkirina greva birçîbûnê girtiyên li girtîgehên Marmarayê xwestine sewqî Îmraliyê bên kirin. Gezer, ragihand ku girtiyan têkildarî Îmraliyê serî li Komîteya Pêşîlêgirtina li Îşkenceyê ya Konseya Ewropayê (CPT) û Wezareta Dadê jî dane û got ku armanca girtiyan ew e ku der barê binpêkirinên mafan de yên li hemberî Abdullah Ocalan û tenduristiya wî agahî wergirin û wiha dawî li axaftina xwe anî: “Tişta herî sereke ya ku girtiyan bi me re parve kir ew e ku heta binpêkirinên mafan ên li Îmraliyê bi dawî nebin dê grevên birçîbûnê bidomin. Gotin ku rêveberiya girtîgehê çi qas bi ser wan de tê bila bê, lê dê greva xwe bidomînin.”
