Girtiya bi navê Remziye Karadag ku 76 rojan di greva birçîbûnê de bû, ji roja bidawîbûna çalakiyê heta niha nayê tedawîkirin. Malbata Karadag da zanîn ku rewşa keça wan nebaş e û rêveberiya girtîgehê bi hinceta ku tev li çalakiya greva birçîbûnê bûye, Karadag derman nakin
Girtiya bi navê Remziye Karadag li Girtîgeha Jinan a Tîpa T ya Xarpêtê tê girtin. Karadag tevî bi hezaran girtiyan, ji bo rakirina tecrîda girankirî ya li ser Rêberê Gelê Kurd Abdullah Ocalan ketibû greva birçîbûnê û 76 rojan çalakiya xwe domand. Karadag bi hinceta ku tev li greva birçîbûnê bûye, nayê dermankirin.
Remziye Karadag di 1’ê çileyê de tev li greva birçîbûnê bû. Di roja 76’emîn a grevê de jî li ser banga Ocalan dawî li çalakiya xwe anî. Karadag û sê hevalên wê yên li heman odeyê, heta niha jî nehatine dermankirin. Têkildarî mijarê xwişka Karadag, Zekiye Karadag axivî û ev agahî dan: “Dema ew û hevalên wê rakirina nexweşxaneyê, leşkeran di rê de heqaret û zexta psîkolojîk lê kir. Hem bi wesayîta rîngê birin nexweşxaneyê û hem jî gotinên weke; ‘Hûn hem dikevin greva birçîbûnê û hem jî li benda dermankirinê ne? Hûn dê neyên dermankirin’ jê re kirine. Piştre jî vegerandin girtîgehê. Me jî serî li ÎHD’ê û hin saziyan din da lê encamek jê derneket.”
16 kîloyan zeîf bûye
Karadag destnîşan kir ku di dema hevdîtinê de wê rewşa xwişka xwe baş nedîtiye û wiha pê de çû: “Xwişka min 16 kîloyan zeîf bûye û bi hinceta ku tev li grevê bûye, nayê dermankirin. Ji wan re gotine; ‘Divê hûn encamên vê çalakiyê jî bidin ber çavên xwe.’ Ji ber çalakiyê, mafê hevdîtin û axaftina bi telefonê ji bo çar mehan lê hatiye qedexekirin.”
Çawa hate girtin?
Remziya Karadag di sala 2014’an de hate girtin û 2 salan di girtîgeha Mêrdînê de ma û piştre hate berdan. Mehek piştre careke din hate girtin û li Girtîgeha Hîlwan a Rihayê ma. Salek piştre jî sirgûnî Girtîgeha Jinan a Tîpa T ya Xarpêtê hate kirin. Di dema sirgûnkirinê de li deriyê pêş ê girtîgehê lêgerîna tazî lê hate ferzkirin. Ji ber ku qebûl nekir, rastî îşkenceyên giran hat û bi mehan cezayê hucreyê lê hate birîn. Li Karadag ku qewlê wê yê girtî bi dawî bûye û diviyabû di 6’ê cotmehê de bihata berdan, ji dosyayeke din 2 sal hikûm lê hate birîn. AMED
