Dayika girtiyê di greva birçîbûnê de Zerdeşt Oduncu, Selma Oduncu anî ziman ku di dema hevdîtinê de kurê wê xwîn vereşî ye. Dayika Selma bang li hemû kesî kir ku li dijî vê neheqiyê dengê xwe derxînin
Hevseroka Kongreya Civaka Demokratîk (KCD) û parlamentera Partiya Demokratîk a Gelan (HDP) a Colemêrgê Leyla Guven di 8’ê mijdara sala 2018’an de ji bo rakirina tecrîda girankirî ya li ser Rêberê Gelê Kurd Abdullah Ocalan, dest bi greva birçîbûnê ya bêdem û bêdorveger kir. Çalakiya Guven 156 roj li pey xwe hişt. Bi heman boneyê, koma yekemîn a girtiyên li girtîgehên bakurê Kurdistanê û Tirkiyeyê jî di 16’ê kanûnê de tev li çalakiya greva birçîbûnê bûn. Ji 16’ê kanûna sala 2018’an heta 1’ê adara îsal jî bi sedan girtî di rojên cuda de tev li çalakiyê bûn. Di 1’ê adarê de jî zêdetirî 7 hezar girtiyan dest bi greva birçîbûnê kir.
Yek ji van girtiyan jî Zerdeşt Oduncu ye. Oduncu li Girtîgeha Tîpa F ya Edîrneyê tê girtin. Oduncu ji bo rakirina tecrîda li ser Ocalan, 118 rojin di greva birçîbûnê de ye û rewşa wî krîtîk e. Têkildarî rewşa Oduncu, parêzera wî Esma Yaşar û dayika wî Selma Oduncu axivîn. Parêzer Yaşar anî ziman ku 15 roj berê bi muwekîlê xwe Zerdeşt re hevdîtin kiriye. Yaşar da zanîn ku greva birçîbûnê bandorekê neyînî li ser muwekîlê wê kiriye û aliyê wî yê çepê tevizî ye û di lenge. Yaşar ragihand ku sê roj berê jî Oduncu bi qasî du saetan bi ser hişê xwe de çûye û rewşa wî nebaş e.
Dayika Oduncu bang kir
Dayik Selma Oduncu jî got ku demek berê kurê wê bi rêya telefonê bi wan re hevdîtin kiriye. Dayika Selma got ku rewşa kurê wê krîtîk e û wiha bi dawî kir: “Herî dawî min di 15’ê adarê de bi kurê xwe re hevdîtin kir. Kurê min li ber çavên min xwîn vereşiya. Divê li hemberî vê yekê tu kes bêdeng nemîne.” MÊRDÎN
