Navenda Nûçeyan
Ji bo rakirina tecrîda li ser Rêberê Gelê Kurd Abdullah Ocalan û azadiya wî li girtîgehan di 27’ê Mijdarê de greva birçîbûnê ya bêdawî û dorveger hatibû destpêkirin. Girtî 40 roj in di greva birçîbûnê de ne û diyar dikin ku heta tecrîd rabe dê çalakiya xwe bidomînin.
Ji dema ku çalakî dest pê kir û heta niha 8 kom tev li greva birçîbûnê bûn û zextên li girtîgehan jî zêde bûne.
Rêveberiyên girtîgehê ji serdegirtina qawîşan heta cezayên dîsîplînê û qedexeyên ragihandinê hewl didin çalakiyê bişikînin lê girtî li ser biryara xwe ne ku çalakiyê bidomînin.
Çalakî belav dibe
Li Kampa Mexmûrê jî ji 18’ê Kanûnê û vir ve berxwedan didome. Li Komeleya Malbatên Şehîdan a Mexmûrê 19 roj in ji bo azadiya Rêberê Gelê Kurd Abdullah Ocalan greva birçîbûnê didome.
Li Kampa Lavrîo a Yewnanistanê jî çalakiya greva birçîbûnê hat destpêkirin. Bi tevlêbûna TCŞ, TJKE û Navenda Çanda Kurdistanê komên ji 8 kesan pêk tên pêşengiyê ji çalakiyê re dikin.
Girtiyên MLKP’ê jî ji bo piştgiriya girtiyên PKK û PAJK’ê jî piştî 7’ê çileyê dê 5 rojan têkevin greva birçîbûnê. Girtiyên MLKP’ê diyar kirin ku bila tecrîda li ser Rêberê Gelê Kurd Abdullah Ocalan bi dawî bibe.
Her wiha li Kantona Kobanê jî bi heman armancî ji bo 7 rojan greva birçîbûnê hat destpêkirin. Çalakiya li Kobanê di roja 3’yemîn de didome.
