Beriya hilbijartinan di 25’ê nîsanê de biryara destgîrkirina herî kêm 200 kesan hatibû dayîn û 128 kes hatibûn destgîrkirin û heta niha 28 kes hatine girtin.
Zext li pêşiya Edliyeya Amedê bi girseyî hate protestokirin. Rêxistin û namzetên parlamenteriyê yên Partiya Çepên Kesk, Partiya Demokratîk a Gelan (HDP), Partiya Herêmên Demokratîk (DBP), Komeleya Hiqûqnasên Azadiyê (OHD), Dayikên Aştiyê, Tevgera Jinên Azad. TJA û nûnerên gelek rêxistinên sivîl tevlî çalakiyê bûn.
Hevseroka HDP’ê ya bajêr Gulîstan Atasoy di çalakiyê de axivî û got, “Tevî ku 4 roj in hiqûqê dikujin jî em li vir in. Di rastiyê de em van senaryoyên wan ên qirêj dizanin. Çawa ku me berê van operasyonên qirêj pûç kir, em ê di pêşerojê de jî têk bibin. Niha hûn hatine dawiya rê. Em dizanin ku wê ev têkoşîn dawiya dawîn bi ser bikeve. Wê dengê aştî, edalet û azadiyê li her derê were bihîstin.”
Namzetê parlamenteriyê yê Partiya Çepên Kesk ê Amedê Mehmet Emîn Aktar jî got, “Em qet matmayî neman. Ji bo ku parastin neyên kirin parêzer girtin, ji bo ku rastiyê nenivîsin rojnamevan girtin. Lê divê bizanibin hiqûq wê ji wan re jî hewce be. Wê ev gel di 14’ê Gulanê de bersiva wan bide. Em netirsiyan û me dev ji têkoşîna xwe bernedin.”
