Girtiyên Girtîgeha Boluyê ragihandin girtî Nurullah Semo 2 sal in bi tena serê xwe di qawîşekî de tê ragirtin û bi gelek binpêkirina mafan re hevrû maye û li dijî helwesta bijîşk û muayenekirina kelemçekirî bang li TTB’ê kirin
Hat ragihandin li Girtîgeha Tîpa F a Boluyê li dijî girtiyên siyasî binpêkirina mafan pêk tê. Girtiyan bi nameya ji girtîgehê şandin qewimandinên li girtîgehê vegotin. Girtiyan da zanîn ku girtî Nurullah Semo 2 sal in bi tena serê xwe li qawişekê tê ragirtin û Semo di her jimartina serê sibê de bi heqaret û gefan re rû bi rû dimîne. Girtiyan got ku tevî hemû hewldanên wan jî Semo nadin odeya wan û hevalên wan girtî bi awayek sîstematîk bi îşkenceyê re hevrû dimînin û metirsiyên ewlehiyê hene.
Bang li TTB’ê kirin
Girtiyan diyar kir ku bijîşk li gorî dozên girtî tên darizandin muameleyê nîşan didin û muayenekirina kelemçekirî tê ferzkirin û ev rewş li dijî rêgeziya pîşeya hekîmiyê ye. Girtiyan bang li Yekîtiya Bijîşkên Tirk (TTB) kirin û wiha gotin: “Dema daxwaza derketina me ya revîrê çêdibe me dernaxin. Heta mehek derbas dibe şûn ve derdixin. Li hember daxwazên lezgîn ker, kor û lal dimînin. Em bang li TTB’ê dikin; bijîşkên endamên saziya wan in û sonda Hîpokrat xwendine li gorî dosyeyên me yên darizandinê bila bi çavek kîn û nefretê nenêrin. Bijîşkên vê sondê xwarine, bi kîndarî li me dinêrin û destên me yên kelemçekirî venakin divê wîjdan û ehlaqê xwe hinek bidarizînin. Cudakirina navbera însanên nexweş ne ehlaqî ye. Em bi bawerin wê TTB’ê guh bide vê banga me û li ser vê rewşê bisekine.”
Silava Xudê jî pir dibînin
Girtiyan da zanîn ku nameyên wan bi awayek sîstematîk tên windakirin û gardiyan koliyên malbatê girtiyan ji wan re dişînin jî ji hev belav dikin. Girtiyan anî ziman ku hemû mafên wan ên bingehîn û civakî yên mîna axaftina telefonê, hevdîtin û gelek tiştên din tên desteserkirin û nahêlin girtî rehet bimînin. Girtiyan got ku rayedar li girtîgehê hewldanên provokatîf pêk tînin û ew bi êrîşan re hevrû dimînin û di sedsala 21’emîn de silava Xwedê jî pir dibînin. AMED
