Ji girtiyên di greva birçîbûnê de Hadî Alçîçek diyar kir ku ew jî di nav de gelek girtî êdî xwîn divereşin. Alçîçek anî ziman ku encam çi dibe bila bibe dê çalakiya xwe berdewam bikin û tecrîdê bişikînin
Girtiyê nexweş Hadî Elçîçek (51) li Girtîgeha Jimar 2 ya Tîpa T ya Tarsûsê tê girtin. Elçîçek ji bo rakirina tecrîda girankirî ya li ser Rêberê Gelê Kurd Abdullah Ocalan 69 roj in di greva birçîbûnê ya bêdem û bêdorveger de ye. Elçîçek herî dawî di 6’ê gulanê de bi kurê xwe Serkan Elçîçek re hevdîtin kir û têkildarî rewşa xwe û hevalên xwe agahî dan.
Têkildarî mijarê kurê Alçîçek, Serkan Elçîçek axivî û anî ziman ku moralê bavî wê pir baş bû. Elçîçek wiha domand: “Bavê min got; ‘rewşa hin hevalên me nebaş e. Ez jî di nav de, gelek heval xwîn divereşin. Bedêl çi dibe bila bibe em ê bigihijin armanca xwe. Heta tecrîd bi dawî nebe em ê dev ji berxwedana xwe bernedin. Em ê bi berxwedanê bi ser bikevin. Serkeftin nêz e. Bibin dengê me da ku em bi hev re bi ser bikevin. 15 hevalên me di rojiya mirinê de ne. Beriya ku kes bimire divê tecrîd bi dawî bibe. Mirin jî tê de be dê çalakiya me berdewam bike.’”
‘Bila ji girtîgehan darbest dernekevin’
Di berdewamê de jî Elçîçek destnîşan kir ku rewşa bavê wî û girtiyên din nebaş e û wiha dawî li axaftina xwe anî: “Bavê min pir zeîf bûye. Niha xwînê diverişe. Her ku diçe rewşa wî xerabtir dibe. Jixwe nexweşiya dil bi bavê min re heye. Em naxwazin ji girtîgehan darbest derkevin. Bila tecrîd bi dawî bibe û girtî bijîn.” EDENE
