Li Girtîgeha Tîpa M a Êlihê girtiyên ku tev li guhertina qanûnî nehatin kirin, şevê din îsyan kirin û gelek qawîş şewitandin. Girtiyan piştre jî dirûşmên ‘îsyan’ berz kirin û dirûşmên wan li derdora girtîgehê jî hate bihîstin. Piştî îsyanê jî gelek wesayîtên ambûlans û agirkujiyê sewqî girtîgehê hatin kirin. Li hêla din gelek polîsên tîmên taybet jî dor li girtîgehê girt.
Piştî ku îsyan li navenda bajêr hate bihîstin, xizmên girtiyan berê xwe dan girtîgehê. Gel heta derengiya şevê li pêşiya girtîgehê sekinî û li benda daxuyaniya rayedaran ma. Hêzên dewletê şewata li girtîgehê vemirandin û bi gaza îsotê êrîşî girtiyan kirin. Piştî vemirandina şewatê hin girtî ji girtîgehên li bajarên derdorê hatin veguhastin.
Piştî îsyana li Girtîgeha Tîpa M a Êlihê, malbatên girtiyan xwestin agahî ji wan re bê dayin. Li ser vê yekê rêveberiya girtîgehê li ber derî daxuyaniyek da. Di daxuyaniyê de hate gotin ku girtiyên ji bilî yên li A1-2-3-4-5-7-8-9-10-11-16-18, B3-5-7-12 sirgûnî Girtîgeha T4 a Amedê hatine kirin.
Bi giştî 439 girtî sirgûnî Amedê hatin kirin. Tê gotin ku 202 girtî li girtîgehê mane. ÊLIH
